Ragga og Dísa syngja í Fríkirkjunni

Tvær hæfileikaríkar söngkonur leiða saman hesta sína í Fríkirkjunni á sunnudaginn. Sú þriðja bætist í hópinn þegar líður á kvöldið.

„Við ákváðum að kýla bara á þetta í öllu jólatónleikaflóðinu,“ segir Ragnheiður Gröndal söngkona.

Blásið verður til tvöfaldra útgáfutónleika í Fríkirkjunni sunnudaginn 18. desember klukkan 20.30. Ragnheiður Gröndal flytur lög af nýjustu plötu sinni, Astrocat Lullaby, og dúettinn Song for Wendy, skipaður þeim Bryndísi Jakobsdóttur og Mads Mouritz, fagnar fyrstu plötu sinni, Meeting Point.

Ragnheiður á von á sínu fyrsta barni í febrúar en lætur það ekki stoppa sig frá tónleikahaldi. „Hugmyndin að því að gera þetta saman kom frá Dísu sem var búin að ákveða að halda útgáfutónleika en vildi gera eitthvað meira úr því. Hún hafði samband við mig og ég ákvað að slá til. Upphaflega ætlaði ég ekkert að halda útgáfutónleika strax, ég er kasólétt og ætlaði að taka því rólega á aðventunni, en það verður gaman að gera þetta saman. Ég held að atriðin okkar passi vel saman og að þetta verði notaleg stund.“

Tónleikarnir verða ekki lausir við aðventublæinn því þegar Ragga og Dísa hafa kynnt plöturnar fyrir tónleikagestum munu þær flytja eftirlætis jólalög sín ásamt vinkonu sinni, Sigríði Thorlacius. Þetta verður í fyrsta sinn sem þessar þrjár hæfileikaríku söngkonur koma einar fram, en áður hafa þær sungið bakraddir saman fyrir Moses Hightower. Tríóið kallar sig Jólabjöllurnar og Ragnheiður tekur vel í það að þær gætu orðið eins konar Borgardætur næstu kynslóðar söngkvenna.

„Það verður spennandi fyrir okkur að syngja þrjár saman. Við erum allar með ólíkar raddir en samt áþekkar þannig að þær blandast held ég mjög vel saman. Það væri gaman að gera eitthvað meira úr þessu.“

Miðaverð á tónleikana er 1.500 krónur í forsölu á Miði.is og 2.000 krónur við inngang.

[email protected]