Fer óhrædd inn í framtíðina

Lagið er unnið í samvinnu við pródúserinn Þormóð en þau munu koma til að halda samvinnunni áfram við meira popp efni.

Lagið má heyra í spilaranum hér að neðan:

Varð til á korteri

„Parísarhjól varð til á einhverju korteri. Við vorum búin að vera að vinna að einhverju og svo þurftum við að fara þannig að Þormóður henti í þetta beat og ég skellti upp texta út einn tveir og bingó. Svo varð það eiginlega bara tilbúið strax. Þetta gerðist í mars en okkur fannst þetta án efa vera sumarlag sem yrði að koma út núna í júní.“

Þar sem lagið fæddist svo hratt segir GDRN að erfitt sé að vita nákvæmlega um hvað það fjallar og undirmeðvitundin hafi spilað hlutverk í textasmíðinni.

„Svo hafa einhverjir spurt mig hvort lagið fjalli um að vera foreldri og ég held að það sé alveg að einhverju leyti rétt. Ég fékk allavega innblástur úr móðurhlutverkinu,“ segir hún brosandi, en hún eignaðist frumburð sinn í fyrra.

„Það gengur allt rosalega vel. Ég er að núna bara að fara á fullt að gera aftur tónlist, litli er að verða eins árs og tíminn bara flýgur. En ég er rosalega spennt að kafa aftur djúpt inn í tónlistina, koma fram á tónleikum og allt sem þessu fylgir.“

Popp og performans

Hún segir að markmiðið með laginu hafi verið að gera popp og það hafi heppnast.

„Ég er búin að vera með mörg járn í eldinum að undanförnu og langaði rosalega mikið að gera popp lag. Ég er búin að vera að vinna í poppi með Þormóði en svo er ég líka búin að vera að prófa mig áfram á ýmsum tónlistarsviðum. Þar má nefna samvinnu við Magnús Jóhann, sem ég vann Sönglagaplötuna með og svo líka Halldór Eldjárn.

Það er einhver róleg tónlist í bígerð, eitthvað experimental, raftónlist sem fer svolítið út í fyrstu plötuna mína og svo hef ég aðeins verið að dýfa tánum í kvikmyndatónlist. Þannig að það er nóg um að vera.“

Gott skref á sínum tíma

Aðspurð hvort það sé plata væntanleg segist hún vona það.

„Það er algjörlega í planinu. Það var ofboðslega gott skref hjá okkur Magga að gefa út Sönglaga plötu á nákvæmlega þessum tíma, í september í fyrra. Við tókum hana upp þegar ég var ólétt, sem var líka krefjandi af því að ég var bara ólétt,“ segir hún hlæjandi og bætir við: „Svo eignaðist ég barn og var í fæðingarorlofi en ég náði samt ágætlega vel að fylgja þessari rólegu plötu. Fólk var að bóka mann aðeins fyrr á kvöldin líka sem var mjög þægilegt,“ segir hún kímin.

„Þannig að ég finn það alveg að þetta var dásamlegt tímabil en ég finn líka fyrir því að ég er tilbúin í smá breytingu. Nú er strákurinn minn að fara að byrja hjá dagmömmu og ég er allt í einu að fara að fá að hafa dagana mína lausa. Ég finn að það sem kraumar í mér er að nú langar mig að fara upp á svið og syngja eitthvað nýtt. Kannski er þetta líka bara sumarið, mig langar að gera taktföst lög og þetta er svona smá sumar gelluorka,“ segir hún brosandi.

Mikilvægt að gera þetta fyrir sjálfa sig

Hún segist hafa lært ýmislegt á undanförnum árum.

„Ég er búin að vera lengi í bransanum en á sama tíma líka rosalega stutt. Þegar ég byrja þá gerist allt rosalega hratt og ég fæ ekki tíma til að svona átta mig endilega á því hver ég væri eða hvað ég væri að gera. Ég gef út mína fyrstu plötu, Hvað ef, árið 2018 og hún verður rosa mikill hittari um leið. Svo gef ég út næstu 2020 og hún svona mallaði meira í gang.

Ég er búin að vera smá stressuð að ég þurfi alltaf að vera að koma með eitthvað nýtt sem slær í gegn en ég hef áttað mig á því að það er ekkert stress. Ég þarf líka að leyfa mér að finna hvað mig langar að gera. Af því að ef ég er ekki að gera þetta fyrir sjálfa mig og fyrir einhvern vöxt í mínu tónlistarlega ferli þá í rauninni staðna ég bara.

Þannig að mig langar að læra meira og mig langar að gera fleiri tilraunir en mig langar líka bara að tilraunastarfsemin færist líka í einfaldleikann, poppið eða hvað það er sem kallar hverju sinni. Þannig að ég er farin að setja aðeins minni pressu á mig að gera allt rosalega vel og vil bara gera það sem mig langar að gera með algjörri einlægni í því verkefni hverju sinni. Svo kemur bara eitthvað nýtt. Þannig að ég fer óhrædd inn í framtíðina,“ segir GDRN að lokum.

Diljá á toppnum

Íslenski listinn á FM957 var stútfullur af íslenskum lögum í dag og af efstu tíu lögum vikunnar eru fimm íslensk. Eurovision söngkonan Diljá situr á toppi listans með lagið sitt Crazy og Emmsjé Gauti í öðru sæti með Þjóðhátíðarlagið Þúsund hjörtu. 

Þá sitja Daniil og Friðrik Dór í fimmta sæti með lagið Aleinn, Aron Can og Birnir í sjötta sæti með Bakka ekki út og Patrik í tíunda sæti með lagið Allar stelpurnar af smáskífunni PBT.

Íslenski listinn er fluttur alla laugardaga á milli klukkan 16:00 og 18:00 á FM957.

Lög Íslenska listans:

Íslenski listinn á Spotify: