Hugmynd sem kviknaði eftir pílagrímsferð til New York

„Ég ætla að spila mismunandi tónlist eftir mig fjögur kvöld í röð og er í leiðinni að gera nokkrum af plötunum mínum skil,“ segir Magnús Jóhann en hann hefur með sanni verið virkur í íslensku tónlistarlífi síðastliðin ár og vakið mikla athygli sem píanóleikari.

Góð afsökun til að líta yfir farinn veg

Magnús segir skemmtilegt að líta yfir farinn veg og jafnvel enduruppgötva eitthvað af lögunum sem hann hefur samið. 

„Það er svo gaman að búa sér til „afsökun“ til að spila þetta efni. Ég hef auðvitað spilað mikið af þessu áður en hef til dæmis mjög sjaldan spilað kvikmyndatónlistina mína og ég geri ekki ráð fyrir að það verði brjálæðislega algengt hjá mér.“

Hugmyndin að þessari tónleikaseríu hefur verið að mallast frá því í haust þegar að Magnús Jóhann mætti á eftirminnilega tónleika í eins konar pílagrímsferð sem hann fór í til New York borgar.

„Ég heimsótti Village Vanguard, djass klúbb í New York, og þar er svona fyrirkomulag að listamenn séu með eins konar residensíu, þar sem viðkomandi spilar tónlistina sína nokkur kvöld í röð og jafnvel tvö sett á hverju kvöldi.

Þegar ég fattaði að þeir væru að gera þetta svona úti þá kveikti það á einhverju hjá mér og ég hugsaði að ég væri til í að gera eitthvað svipað. Þannig að ég ákvað að slá til og skipuleggja þessa tónleikaröð í Mengi. Ég spila fjögur kvöld í röð og þetta er ágætis afsökun til að gera allri þessari músík góð skil. Það má segja að þetta sé eins konar yfirlitssýning hjá mér.“

Ferjaði flygilinn

Þar sem hann spilar svona mörg kvöld ákvað Magnús að taka þetta alla leið og ferja flygilinn sinn niður í Mengi.

„Ég er svo heppinn að eiga næs flygil sem er heima í litlu íbúðinni minni en flutningurinn var svolítil aðgerð. Það er svo frábært að geta verið með sitt eigið, við píanóleikararnir þurfum oft að sætta okkur við það að spila á það sem býðst, sem hefur sína kosti og galla. 

Maður hefur auðvitað þurft að aðlaga sig hverju sinni að því sem er í boði sem er gott fyrir mann, en það er náttúrulega geggjað að spila á sitt eigið.“

Hér má sjá dagskrá tónleikaraðarinnar:

20. apríl - Without Listening kl. 20.00

Hljómplata Magnúsar frá árinu 2020 flutt ásamt Magnúsi T. Eliasen á trommum og Tuma Árnasyni á saxófon og rafhljóðfæri.

21. apríl - Magnús Jóhann & Skúli Sverrisson kl 20.00

Árið 2021 gáfu Magnús og Skúli út hljómplötuna Án tillits, þeir hyggjast flytja efni af henni ásamt öðru.

22. apríl - Uglur & Rofnar kl 20.00

Magnús kemur fram ásamt strengjakvartett og flytur tónlist úr kvikmyndinni Uglur eftir Teit Magnússon ásamt efni af væntanlegri sólóplötu sinni, Rofnar.

23. apríl - Einleikur kl 20.00

Magnús lokar tónleikasyrpu sinni einn við flygilinn, lítur við á kunnuglegum slóðum og jafnvel kannar framandi lendur.

Lifnar við í höndum hæfileikaríks fólks

„Nú erum við búin að vera að æfa og ég er að spila músík sem ég samdi fyrir löngu. Maður er búinn að sitja lengi á nóttunni yfir þessu og það er gaman að túlka efnið yfir í live útsendingu og hugsa hvernig ég geti gert þetta á tónleikum. Svo er magnað að sjá þetta lifna við í höndum á hæfileikaríku fólki.

Mig langaði að búa til vettvang til að spila alla þessa músík, af því það er gaman og hollt fyrir mann að spila og hollt fyrir mig að gera alla þessa músík upp. Þetta eru um fimmtíu lög og það er mjög gaman að fara yfir þetta allt.“

Í spilaranum hér fyrir neðan má heyra lagið Án titils eftir Magnús Jóhann og bassaleikarann Skúla Sverrisson:

Verðmætur staður fyrir Reykvíkinga

Þegar hugmyndin að tónleikaröðinni var komin í farveg segist Magnús strax hafa haft samband við Mengi.

„Ég vissi að þau væri farin að gera eitthvað í þessum dúr, þau voru með improv röð hjá sér og Davíð Þór píanisti var til dæmis líka búinn að spila þar spuna þrjú kvöld í röð. Mengi er frábær vettvangur fyrir alls konar og mér finnst mikilvægt að vekja athygli á því. Við Íslendingar búum vel að því að vera með þennan vettvang fyrir tilraunamennsku á Óðinsgötunni.“

Magnús hefur spilað fjöldann allan af tónleikum og giggum.

„Ég er búinn að vera undanfarin tvö eða þrjú ár hægt og rólega á þeirri vegferð að leggja meiri áherslu á mína músík, það sem ég er að gefa út undir mínu eigin nafni en ég er búinn að gefa út fjórar plötur. Það er öðruvísi að gera hluti fyrir aðra.“

Plötusamningur í Bandaríkjunum

Það er ýmislegt spennandi á döfinni hjá Magnúsi.

„Ég var að gera plötusamning við bandarískt label sem heitir Found og það er plata væntanleg. Þannig að það er allt að fara af stað á næstunni og margt spennandi framundan.“

Sköpunargleðin er honum eðlislæg og hugmyndirnar koma til hans á ólíka vegu.

„Ég hef eiginlega alltaf sagt að maður geti sótt innblástur hvaðan sem er og ég trúi rosalega mikið á það. Það getur hvað sem er verið þér innblástur, sama hvort það er að horfa á bíómynd eða málverk, eiga samtal, fara göngutúr eða að elda mat. Allt sem kemur þér á sporið eða veitir þér innblástur andlega það getur verið fyrsta skrefið í að búa til tónverk eða eitthvað skapandi. Ég held að ef maður er kveikt á móttökurunum þá getur hvað sem er verið inspererandi.

Ég er samt auðvitað ekki að segja að ég verði svo innblásinn í hvert skipti sem ég elda. Þetta er meira þannig að þegar maður er í þannig headspace-i að maður er að skapa og búa til þá getur hvað sem er veitt innblástur.“

Tilfinningar og hugvit

Haustin eru hans frjóasti tími hvað sköpun varðar.

„Það er eins og það kvikni algjörlega á öllu hjá mér á haustin. Ég næ alltaf að semja þá og er lang mest kreatívur. Svo á ég líka afmæli í september,“ segir hann brosandi.

Magnús Jóhann er lærður djass píanóleikari og segir að allt sem hann geri byggi á spuna að einhverju leyti.

„Fyrir mér skiptir miklu máli að blanda saman hinu tilfinningatengda og hugvitstengda, þessu emotional og intellectual. Að skapa þegar maður kemst í flæðisástand og reyna svo að grípa gæsina þegar hún gefst. Þegar ég fæ hugmynd skrifa ég hana til dæmis á blað eða tek hana upp á símanum. Það getur verið einn hljómur eða örlítil laglína, stundum eitthvað pínulítið, og svo getur verið að maður komi aftur að því og klári það nokkrum árum síðar. 

Hluti af þessu er samt líka að svitna við þetta, þegar maður verður til dæmis að klára ákveðið lag. Mér finnst besta músíkin koma frá tilfinningahliðinni á einhvern abstrakt hátt, það kemur út frá einhverjum tilfinningum. Svo þarf hugvitshliðin að koma að því að púsla öllu saman, horfa krítískt á hugmyndina og beisla hana yfir í lag,“ segir Magnús Jóhann að lokum.

Hér má finna nánari upplýsingar um tónleikaröðina.