Tónlist

Elín Hall og GDRN sameina krafta sína í nýju lagi

Elma Rut Valtýsdóttir skrifar
Tónlistarkonurnar Elín Hall og GDRN sameina krafta sína í nýju lagi.
Tónlistarkonurnar Elín Hall og GDRN sameina krafta sína í nýju lagi.

Tónlistarkonurnar Elín Hall og Guðrún Ýr Eyfjörð, betur þekkt sem GDRN, leiða saman hesta sína í laginu Júpíter sem kom út í dag. 

Elín Hall skaust upp á stjörnuhimininn þegar hún fór með aðalhlutverk í kvikmyndinni Lof mér að falla árið 2018. Síðan þá hefur hún stimplað sig inn í íslenskt tónlistar- og leiklistarlíf af miklum krafti. Undanfarna mánuði hefur hún svo farið með hlutverk Reiða Bubba í sýningunni Níu líf og hlotið mikið lof fyrir frammistöðu sína.

Lagið Júpíter er fyrsta lag af væntanlegri plötu Elínar sem kemur út í haust. Að þessu sinni fékk hún hina vinsælu söngkonu GDRN til liðs við sig en hún var meðal annars valin söngkona ársins á Hlustendaverðlaununum á síðasta ári.

Lagið kom til hennar í draumi

Elín samdi bæði lag og texta og er lagið á persónulegu nótunum.

„Lagið kom til mín fyrir rúmlega tveimur árum síðan þegar ég var mjög týnd með í hvaða átt ég vildi stefna. Mig dreymdi lagið og vaknaði með viðlagið á heilanum,“ segir Elín.

„Júpíter táknar nýtt upphaf fyrir mig. Það fjallar um að kveðja gamlan vítahring. Maður þarf að loka hurðinni alveg svo að aðrar opnist. Það er bæði vont en líka fallegt.“

Lagið má hlusta á hér að neðan. Upptökustjórn og útsetningu annaðist Elín ásamt Reyni Snæ.

Tónlist

Tengdar fréttir

„Maður er eins og guð í smá stund“

Tónlistarkonan og leikkonan Elín Hall skaust fyrst fram á sjónarsviðið árið 2015 þegar hún tók þátt í Söngvakeppninni aðeins sextán ára gömul. Mikið vatn hefur runnið til sjávar síðan þá hjá Elínu, sem leikur meðal annars í sýningunni Níu líf í Borgarleikhúsinu og hefur gefið út sóló plötu. Elín Hall er tilnefnd sem Nýliði ársins á Hlustendaverðlaununum.

„Hausinn minn er eina heimilið sem ég mun búa í alla ævi“

Leikkonan Elín Sif Hall var að stíga sín fyrstu skref í Borgarleikhúsinu í leikritinu 9 líf en hún vakti meðal annars athygli fyrir hlutverk sitt í kvikmyndinni Lof mér að falla fyrir nokkrum árum. Hún lýsir sér sem listamanni í mótun sem elskar að kaupa notuð föt og drekka kaffi. Auk þess reynir hún að finna innblástur í öllu en sköpunargleðin nærir andlega heilsu hennar hvað mest. Elín Hall er viðmælandi vikunnar í Innblæstrinum.

Mikilvægt að geta verið GDRN inn á milli

Tónlistarkonan Guðrún Ýr Eyfjörð vakti fyrst athygli í íslensku samfélagi árið 2017 þegar hún sendi frá sér sitt fyrsta lag, Ein. Mikið vatn hefur runnið til sjávar síðan en hún hefur meðal annars farið með aðalhlutverk í Netflix seríunni Katla og gefið út nokkrar plötur ásamt því að eignast barn. Næstkomandi laugardag 11. febrúar verða hún og Magnús Jóhann með útgáfutónleika í Hörpu á plötunni Tíu íslensk sönglög sem þau sendu frá sér síðastliðið haust. Blaðamaður tók púlsinn á þessu öfluga tvíeyki og fékk að heyra nánar frá nýjum veruleika Guðrúnar.



Mest lesið


Fleiri fréttir

Sjá meira


×

Mest lesið


Tarot dagsins

Dragðu spil og sjáðu hvaða spádóm það geymir.