Svekkjandi tap hjá Alberti og fé­lögum eftir að hafa komist yfir

Fiorentina tapaði öðrum deildarleiknum í röð, 2-1 gegn Udinese. Albert Guðmundsson byrjaði á bekknum en var settur inn á þegar liðið lenti undir. 

Skammt var liðið af leiknum þegar Moise Kean tók forystuna fyrir Fiorentina af vítapunktinum. Riccardo Sottil gabbaði varnarmann og fiskaði vítið, dómarinn flautaði ekki fyrst um sinn en var sendur í skjáinn og benti svo á punktinn.

Sottil vissi sjálfur að víti ætti að dæma og fékk gult spjald fyrir mótmæli þegar dómarinn dæmdi ekki strax.

Kean steig svo á punktinn og skoraði af öryggi, setti boltann á mitt markið.

Fyrri hálfleikur var annars fremur tíðindalítill, fyrir utan eitt fínt færi sem fór forgörðum hjá Fiorentina. Staðan 1-0 í hálfleik en það breyttist fljótt þegar út í seinni hálfleik var haldið.

Lorenzo Lucca jafnaði muninn á 49. mínútu og á 57. mínútu var Udinese komið yfir eftir mark Florians Thauvin.

Þá þurftu heimamenn aukinn kraft fram á við og skiptu Alberti inn á skömmu síðar.

Þeim tókst hins vegar ekki að koma öðru marki að og þurftu að sætta sig við annað deildartapið í röð.

Fiorentina er í fimmta sæti deildarinnar með 31 stig, þremur stigum frá Inter og Lazio í sætunum fyrir ofan og níu stigum frá toppliði Atalanta. Udinese fór með sigrinum upp í níunda sæti með 23 stig.