Mörg hundruð víga­menn frá Írak til að­stoðar Assad-liða

Uppreisnarmenn úr fjölmörgum hópum sem haldið hafa til í norðvestanverðu Sýrlandi, með stuðningi frá yfirvöldum í Tyrklandi, um árabil fóru eins og stormsveipur yfir varnarlínur Assad-liða í síðustu viku. Árásirnar komu verjendunum alfarið á óvart og tókst uppreisnarmönnum að leggja hald á fjölmörg vopnabúr og hergagnageymslur stjórnarhersins.

Sjá einnig: Hafa náð tökum á hálfri Aleppo og fjölda þorpa

Hóparnir tóku alla Aleppo og sóttu fram til bæði austurs og suðurs. Fjölmörg þorp og bæir hafa fallið í hendur uppreisnarmanna.

Sjá má grófa mynd af stöðunni á korti Liveuamap.

Ferðuðust í smáum hópum til að forðast loftárásir

Aleppo var lengi eitt af höfuðvígum uppreisnarinnar í Sýrlandi en féll í hendur Assad-liða, eftir umfangsmikil og langvarandi átök, árið 2016. Þá nutu Assad-liðar mikils stuðnings frá Rússum, klerkastjórninni í Íran og Hezbollah frá Líbanon, en samtökin voru stofnuð af Írönum á sínum tíma.

Þessir bakhjarlar Assad hafa nú öðrum hnöppum að hneppa, þó Rússar hafi gert þó nokkrar loftárásir á bæi og borgir undir stjórn uppreisnarmanna á undanförnum dögum.

Heimildarmenn Reuters í bæði Írak og Sýrlandi segja að minnsta kosti þrjú hundruð meðlimir tveggja hópa sem kallast Bard og Nujabaa hafa farið frá Írak til Sýrlands. Þeir eru sagðir hafa farið yfir landamærin í smáum hópum til að forðast loftárásir Bandaríkjamanna.

Á árum áður, þegar baráttan gegn Íslamska ríkinu í Írak og Sýrlandi stóð sem hæst, komu Íranar að stofnun margra vopnahópa sjíta í Írak. Á ensku hafa þessir hópar verið kallaðir Popular Mobalization Forces eða PMF. Margir hópar hafa myndað regnhlífarsamtök sem kallast Íslamska andspyrnuhreyfingin og hafa þessir hópar á undanförnum árum gert ítrekaðar árásir á bandaríska hermenn í Írak og í Sýrlandi.

Stærsti hópurinn ber nafnið Kataib Hezbollah.

Sjá einnig: Felldu einn af leiðtogum Kataib Hezbollah í drónaárás

Badr er eldri en PMF samtökin en hópurinn varð aðili að PMF sveitunum árið 2014 og hefur áður sent sveitir til stuðnings Assads í Sýrlandi. Nujabaa tilheyriur einnig PMF og íslömsku andspyrnuhreyfingunni svokölluðu.

Ráðamenn í Tyrklandi segjast enga aðkomu hafa haft af árásum uppreisnarmanna síðustu daga.

Vildu stofna eigið kalífadæmi

Uppreisnar- og vígahóparnir í norvestanverðu Sýrlandi eru að mestu leiddir af samtökum sem kallast Hayat Tahrir al-Sham eða HTS. Það eru öflugustu samtökin á svæðinu og eru þau leidd af manni sem heitir Abu Mohammed al-Joulani.

Rætur HTS má rekja til upprisu Íslamska ríkisins en margir af upprunalegum meðlimum hópsins fóru frá Írak til Sýrlands á sínum tíma, með því markmiði að berjast við stjórnarhers Assads og stofna kalífadæmi þar. Árið 2013 reyndu leiðtogar Íslamska ríkisins að þvinga sameiningu ISIS og Nusra og það tóku leiðtogar síðarnefndu samtakanna ekki í mál.

Þess í stað gengu þeir í lið með al-Qaeda og í gegnum árin hafa HTS-liðar reglulega handsamað ISIS-liða í Sýrlandi og tekið þá af lífi.

Í umfjöllun New York Times um HTS kemur fram að leiðtogar hópsins hafi sýnt lítinn áhuga á að gera hryðjuverkaárásir og hafi þess í stað viljað einbeita sér að því að mynda eigið ríki í Sýrlandi. Með það að leiðarljósi hafi þeir slitið á tengsl sín við al-Qaeda árið 2016, að hluta til svo aðrir uppreisnarhópar væru líklegri til að ganga til liðs við þá.

Sérfræðingar segja að dregið hafi verið úr öfgum innan samtakanna en leiðtogar þeirra séu þó enn að mestu leyti skoðanabræður al-Qaeda.