Sérútgáfa Kærleikskúlunnar afhjúpuð á morgun

Styrktarfélag lamaðra og fatlaðra hefur staðið að útgáfu Kærleikskúlunnar frá árinu 2003 og í ár kemur út tuttugasta útgáfa kúlunnar. Kúla með stroku eftir þýsku listakonuna Karin Sander er Kærleikskúla ársins 2022 en auk hinnar auk hinnar árlegu útgáfu Kærleikskúlunnar hefur Karin Sander einnig útbúið og gefið Styrktarfélagi lamaðra og fatlaðra sérútgáfu Kærleikskúlunnar sem kemur út í aðeins tuttugu eintökum í tilefni af 20 ára útgáfuári hennar.

Sérútgáfan verður afhjúpuð í viðveru listamannsins á morgun, föstudaginn 9. desember kl. 17, í i8 galleríi við Tryggvagötu 16, þar sem bæði Kærleikskúla ársins og sérútgáfan verða fáanlegar til sölu. Allur ágóði rennur óskiptur til sumarbúðanna í Reykjadalog eru áhugasamir hjartanlega velkomnir.

Kúla með stroku

Handgerð rauð pensilstroka listamannsins á Kærleikskúlunni svífur í jólatrénu stendur sem tákn um aðgát, sjálfsígrundun og um leið endapunkt ársins sem er að líða. Kúla með stroku er því hreyfanlegt, síbreytilegt málverk þar sem umhverfið verður hluti af verkinu.

„Ég nálgaðist Kærleikskúluna eins og ég nálgast öll mín verkefni, rannsakaði söguna á bak við viðfangsefnið og hefðina, sögu stofnunarinnar sjálfrar, bakgrunn efnis og aðferða. 

Ég þekki fyrri útgáfur Kærleikskúlunnar og hver þeirra er einstök. Mín útfærsla er hreyfanleg pensilstroka, sem markar umhverfi sitt,” 

útskýrir Karin Sander, spurð út í nálgun hennar á útfærslu Kærleikskúlunnar.

Karin Sander er einn fremsti og afkastamesti listamaður sinnar kynslóðar. Hún býr og starfar í Berlín og Zürich og hefur verið viðloðandi íslenskt listalíf síðan snemma á tíunda áratugnum.

„Ég fæ innblástur gegnum það að halda áfram,” segir Karin en verk hennar einkennast af tilviljunum og tíma þar sem hún rýnir í tilbúnar aðstæður og rými út frá félags- og sögulegu samhengi. Verk hennar hafa verið sýnd á einkasýningum og tvíæringum um allan heim og finnast í opinberum söfnum og safneignum víða um lönd, þar á meðal Museum of Modern Art og Metropolitan-listasafninu í New York, Hirshhorn-safninu í Washington DC, San Francisco Museum of Modern Art, National Museum of Art í Osaka, Ísrael-safninu í Jerúsalem, Staatsgalerie Stuttgart, Kunstmuseum í Stuttgart og Listasafni Reykjavíkur.

Karin Sander hefur gegnt prófessorstöðu í arkitektúr og listum við ETH (Swiss Federal Institute of Technology) í Zürich síðan 2007. Sander verður, ásamt Philip Ursprung, fulltrúi Sviss á átjánda alþjóðlega arkitektúrtvíæringnum í Feneyjum 2023.

Karin verður viðstödd afhjúpun sérútgáfu Kærleikskúlunnar í i8 galleríi og segist bera taugar til Íslands.

„Ég er hrifin af Íslandi, landslaginu og fólkinu. Hér á ég góða vini og ég hlakka alltaf til að koma hingað. Ég hef haldið hér margar listsýningar og verk mín eru hluti af bæði einkasöfnum og safneign opinberra safna. Árið 2018-19 vann ég samkeppni um listaverk í almenningsrými í Vogabyggð sem ég vonast til að verði afhjúpað fljótlega,“ segir Karin.

Kærleikskúlan hluti af jólahefðinni

Kærleikskúlan hefur yfir árin fengið frábærar viðtökur landsmanna og er árleg útgáfa hennar orðin hluti af jólahefð margra. Tilgangurinn með sölu Kærleikskúlunnar er að auðga líf fatlaðra barna og ungmenna, með því að efla starfsemi Reykjadals í Mosfellsdal sem Styrktarfélagið á og rekur ásamt Æfingastöðinni í Reykjavík. Boðið er upp á bæði sumar- og helgardvöl allt árið um kring sem er börnunum, ungmönnum og fjölskyldum þeirra afar mikilvæg en þar er lagt upp úr því að allir upplifi gleði og ævintýri - eignast vini og dýrmætar minningar. Auk þess hefur Reykjadalur staðið að sumarbúðum í Háholti í Skagafirði frá árinu 2020 og er undirbúningur fyrir komandi sumar þegar hafinn.

Kærleikskúlan er fallegur listmunur og skemmtileg til söfnunar en það sem gerir hana dýrmæta er innihaldið – kærleikurinn. Nafn kúlunnar er táknrænt.

Handhafi kærleikskúlunnar

Steinunn Ása Þorvaldsdóttir er handhafi Kærleikskúlunnar 2022. Hún hefur látið til sín taka á mörgum sviðum samfélagsins, í rétttindabaráttu fatlaðs fólks, boðið sig fram til alþingis til að fylgja eftir hugsjónum sínum, tekist á við stofnanir og stjórnvöld ef þurft hefur og er hún einn af þáttastjórnendum sjónvarpsþáttarins margverðlaunaða ,,Með okkar augum”.

Nýlega kom út bæklingurinn ,,Saga Steinunnar" hjá Mannréttinda- og lýðræðisskrifstofu Reykjavíkurborgar. Þar rekur Steinunn Ása sína sögu og reynslu af fordómum og ofbeldi - og segir meðal annars: ,,Fáfræði er líka hræðsla - og fordómar eru hluti af okkur en við megum ekki láta fordóma stjórna okkur (...) það er mikilvægt að samfélagið taki fötluðu fólki eins og það er, beri virðingu fyrir því og geri ráð fyrir okkur. ... Eins og margoft hefur komið fram þá er það mikilvægt að halda áfram og gefast ekki upp. Reynslan okkar hjálpar til. Í dag er ég sjálf sterk og hugrökk kona sem vil segja söguna mína …"