María er mætt með dýrindis hátíðarétti fyrir páskana á Heimkaup. Uppskriftirnar verða aðgengilgar fram á annan í páskum. Hér eru fjórar þeirra sem við gátum ekki stillt okkur um að birta.

Fylltar kalkúnabringur

Fyllt kalkúnabringa sem gælir við bragðlaukana.

Smelltu hér til að nálgast hráefnið í réttinn.

Hráefni

• Um 1 kg kalkúnabringa 1000-1200 gr bringa dugar fyrir c.a 6 manns

Fylling:

• 20 gr ósaltað smjör
• 125 gr sveppir
• 2 marin hvítlauksrif
• 150 gr beikon
• 25-30 gr ristaðar furuhnetur
• 70 gr brauðteninga (ekki þurrt brauð heldur þessa góðu sem gjarnan eru settir í salat).
• 45 gr þurrkaðar aprikósur (lífrænt ræktaðar enn betri)
• 100 gr Philadelfia light ost með hvítlauk
• 1/2-1 dl rjómi
• 2 msk fersk steinselja smátt skorin
• 1 tsk þurrkað timian
• 1/2 tsk fínt borðsalt
• pipar

Aðferð

Fylling:

1. Byrjið á að rista furuhnetur á pönnu og setjið til hliðar
2. Næst er smjörið brætt á pönnu og þunnt skornir sveppir steiktir vel upp úr smjörinu þar til þeir eru orðnir brúnir
3. Bætið mörðum hvítlauksrifum út á pönnuna og passið að þau brenni ekki því þau verða beisk við það
4. Leyfið hvítlauknum að mýkjast í sveppunum
5. Skerið eða klippið beikonið út á pönnuna og leyfið að fá á sig hvítan lit
6. Skerið apríkósurnar smátt og bætið á pönnuna ásamt restinni af innihaldsefnunum, þar til þetta verður að góðum mjúkum graut
7. Setjið svo allt saman í matvinnsluvél og vinnið létt þar til fyllingin er orðin að þykkum kekkjóttum graut (passið að vinna alls ekki of mikið, á að vera vel kekkjótt með bitum)

Aðferð við að fylla bringuna:

1. Gerið svokallaðan fiðrildaskurð á bringuna með því að skera hana í tvennt fyrir miðju en láta hana samt hanga saman á öðrum endanum
2. Setjið filmuplast undir og ofan á bringuna og berjið hana með kökukefli eða kjöthamri svo hún verði þunn
3. Hitið nú ofninn á 180 C°undir og yfir hita (alls ekki blástur því það þurrkar kjötið)
4. Smyrjið fyllingunni á bringuna og rúllið henni svo upp og bindið saman með snæri
5. Þegar búið er að fylla bringuna er 50 gr ósalaltað smjör brætt og smurt vel yfir hana
6. Saltið létt og piprið og toppið svo með því að krydda yfir með Bezt á Kalkúninn kryddinu
7. Raðið gulrótum í botninn á eldföstu móti til að mynda smá bil undir bringunni og hellið vatni eða hvítvíni í botninn á eldfasta mótinu. Leggið Bringuna ofan á gulræturnar
8. Eldið svo við 180 C°hita í 1,5 klst - 2 klst eftir stærð bringunnar, 1100 gr er c.a 1,5 klst stærri bringa er lengur

Döðlukaka með ís og heitri karamellusósu

Dúnmjúk döðlukaka í eftirrétt. 

Smelltu hér til að nálgast hráefnið í kökuna.

Döðlukaka

• 250 gr döðlur
• 3 dl sjóðandi heitt vatn (soðið)
• 100 gr mjúkt smjör
• 130 gr púðursykur
• 2 egg
• 150 gr hveiti
• 150 gr dökkir súkkulaðidropar
• 1/2 tsk salt
• 1 tsk matarsódi
• 1 tsk vanilludropar

Heit karamellusósa

• 120 gr smjör
• 100 gr púðursykur
• 1 dl rjómi
• 1/2 tsk vanilludropar
• 1/2 tsk salt

Aðferð

Döðlukaka

1. Hitið ofninn á 180 °C blástur
2. Sjóðið 3 dl af vatni og hellið því sjóðandi heitu yfir döðlurnar ásamt súkkulaði og vanilludropum og leggið til hliðar
3. Hrærið í hrærivél saman mjúku smjöri og sykrinum þar til létt og ljóst og skafið með köntum
4. Bætið þá út í einu eggi í einu þar til er orðið loftkennt og ljóst
5. Maukið nú döðlurnar með vatninu og súkkulaðinu í, í blandara/matvinnsluvél eða stappið vel saman með gaffli (vatnið á að vera með) og bætið út í deigið ásamt hveiti, salti og matarsóda
6. Hrærið nú allt vel saman en ekki of mikið, bara þar til deigið er rétt blandað saman. Smyrjið 26 cm kökumót og hellið deiginu í það og bakið í 30 mínútur
7. Gerið karamellusósuna á meðan

Heit karamellusósa

1. Setjið smjör í pott og bræðið við vægan hita
2. Bætið þá sykrinum og restinni af hráefnunum út í pottinn og látið byrja að sjóða
3. Hærið af og til í sósunni og látið sjóða í eins og 5-10 mínútur
4. Berið kökuna fram volga með vanilluís og heitri karamellusósunni

Lambalæri með ofnbökuðu grænmeti

Smelltu hér til að nálgast hráefnið í réttinn

Ofnbakað grænmeti

• 1 stór bökunarkartafla
• 1 stór sæt kartafla
• 1 stór gul­rót
• 1 rauðlaukur
• 1 græn paprika
• Ólífuolía
• Rósmarín
• Salt
• Pipar

Aðferð:

1. Skerið allt grænmetið smátt niður og setjið á bökunarplötu með smjörpappa
2. Hellið olíu vel yfir allt grænmetið og saltið, piprið og kryddið með þurrkuðu rósmarín
3. Nuddið nú öllu vel saman og bakið við 190°C blástur í eins og 1 klst

Lambalærið

• 1 stk lambalæri (c.a 1,5-2 kg)
• Salt og pipar
• Bezt Á Lambið kryddið
• 2 tsk þurrkað rósmarín

Aðferð

1. Byrjið á að salta og pipra lambið vel allan hringinn bæði undir og yfir
2. Setjið svo Bezt Á Lambið kryddið létt yfir
3. Að lokum strái ég þurrkuðu rósmarín yfir allt í litlu magni
4. Bakið í ofni við 200°C blást­ur í 1,5 klst jafnvel ögn lengur eftir því hversu rautt þið viljið hafa kjötið

Oreo rúlluterta 

Geggjuð Oreo rúlluterta með rjómaosta vanillukremi og súkkulaðihjúp sem þarf ekki að baka.

Smelltu hér til að nálgast hráefnið í kökuna

Hráefni

Kökubotninn

• 350 gr oreo kex
• 200 gr Philadelphia light
• Kremið
• 100 gr mjúkt smjör
• 260 gr flórsykur
• 50 gr Philadelphia Light
• 1 tsk vanilludropar

Hjúpur

• 200 gr hreint Milka súkkulaði bráðið

Aðferð

Kökubotninn

1. Setjið allt kexið í blandara og malið í fínt duft
2. Færið næst yfir í hrærivélarskál og bætið 200 gr af rjómaostinum út í
3. Hærið vel saman þar til er orðið að klístruðu deigi og allt vel blandað saman
4. Setjið deigið á disk með filmuplasti yfir og kælið í eins og 30 mín, má vera lengur, og gerið kremið til á meðan

Kremið

1. Byrjið á að þeyta mjúkt smjörið í smá stund
2. Bætið næst flórsykri, vanillu og rjómaosti út í og aukið hraðann
3. Þeytið þar til kremið er orðið vel ljóst og loftkennt gæti tekið alveg 5-7 mínútur og látið standa á borði þar til það er sett á kökuna

Samsetning

1. Takið deigið úr kælir og setjið það ofan á smjörpappa
2. Leggjið aðra örk af smjörpappír yfir og fletjið það út á milli pappanna með kökukefli í eins og 1 cm þykkan ferning
3. Takið efri pappann af og smyrjið næst kreminu yfir ferninginn og skiljið eftir án krems eins og cm frá köntunum
4. Rúllið svo kökunni upp með því að nota pappírinn sem er undir, þið togið í endann næst ykkur og rúllið upp með því að halda alltaf í endann meðan þið rúllið
5. Setjið næst upprúllaða kökuna með kreminu á inn í fyrstir og á meðan er gott að bræða súkkulaðið
6. Bræðið 200 gr Milka súkkulaði yfir vatnsbaði og hellið því svo yfir kökuna og smyrjið vel yfir hliðarnar líka
7. Leyfið súkkulaðinu ögn að storkna á kökunni upp á borði eða við opinn glugga
8. Þegar súkkulaðið hefur storknað aðeins, þá er gott að setja kökuna í frystir í lágmark 30-60 mínútur áður en hún er borin fram
9. Geymið kökuna ávallt í frystir og berið fram frosna, þannig er hún laaaangbest