Forðast drama eins og heitan eldinn

Sunneva hefur náð langt í listasenunni og hefur hún ferðast víða um heiminn og haldið listasýningar. Nokkur af verkum hennar voru til sýnis á einni stærstu listamessu í Norðurlöndunum í síðustu viku; Market ART Fair. 

Sunneva og Baltasar hafa unnið saman að stórum verkefnum og má þar nefna Netflix þáttaröðina Katla, Ófærð 3 og Snertingu sem verður frumsýnd 29. maí næstkomandi. Baltasar sá um leikstjórn og Sunneva um leikmyndirnar. 

Frumraun Sunnevu í búningahönnun fyrir leikhús var Njála og hlaut hún Grímuverðlaun 2015 fyrir búningana í þeirri sýningu.

Sunneva Ása sýnir lesendum Vísis hina hliðina þessa vikuna.

Fullt nafn? Sunneva Ása Weisshappel

Aldur? 35 ára

Starf? Listakona

Fjölskyldan? Með hverjum býrðu? Með Balta og Stormi, hænunum okkar, hestum og kisunni Ösku.

Þín mesta gæfa í lífinu? Heilbrigði og fæðast hér á Íslandi.

Hugarðu að heilsunni, þá hvernig? Reyni eftir bestu getu, en minn akkilesarhæll er nikótín. Ég borða hollan mat, hætti að drekka fyrir löngu síðan, stunda hreyfingu, jóga, hestamennsku og fleira.

Hvað gerirðu til að endurhlaða batteríin? Fer í sund, sánu, pottinn, hestbak, hugleiði, jóga eða kannski swet. Fer eins langt í burtu frá margmenni og ég get, slekk á símanum, sef og drekk ferska djúsa, umvef mig fólki sem ég elska og hugsa um dýrin mín.

Hvað er á döfinni? Listamannaspjall í Nýló, frumsýna Snertingu og eignast litla stelpu í sumar.

Fallegasti staður á landinu? Rauðhólar, Fjallabak, Stórurð og Vestfirðir.

En í heiminum? Úff, hef ekki séð allan heiminn en af því sem ég hef upplifað myndi ég segja Glistening Waters sem er glóandi lón á norðurströnd Jamaíku sem ég synti í með Anni vínkonu minni, fossaböðin í Iscles; fjallaþorpi vina minna í Piranía fjöllunum á Spáni og djúpt inn frumskógum Limpopo, sem við Balti bjuggum í á meðan hann var að skjóta Beast í Suður Afríku.

Hvað hefur mótað þig mest? Erfiðleikar og hindranir.

Uppskrift að drauma sunnudegi? Erlendis, vakna úti í náttúrunni við sólina að vekja mig og eiga heilan dag í góðu veðri, félagskap og mat, en hér heima upp á hálendi í hestaferð. 

Mér líður best í náttúrunni.

Hvað er það fyrsta sem þú gerir þú vaknar? Fæ mér kaffibolla og síðan annan.

En það síðasta sem þú gerir áður en þú ferð að sofa? Tannbursta, ber á mig handáburð og varasalva. Skrolla oft í gegn um myndir á Pinterest fyrir innblástur.

Hvað viltu upplifa áður en þú deyrð? Fæða barn og vera mamma. Halda áfram að lenda í ævintýrum.

Besta heilræði sem þú hefur fengið? Það sem við segjum um fólk segir meira um okkar eigin persónu en þeirra eigin. Hafðu húmor fyrir fólki og ég forðast drama eins og heitann eldinn.

„Just because some people are fueled by drama doesn’t mean you have to attend their performance.“

Býrðu yfir einhverjum leyndum hæfileikum? Ég sagði nei, en Solla vinkona mín var að lesa yfir og sagði að ég sé sjúklega góður kokkur.

Hvenær fórstu að gráta síðast og af hverju? Ég datt niður tröppurnar heima og fór úr hnélið síðustu helgi. 

Grét ein hressilega á gólfinu í svona góðar tíu mínutur áður en ég náði að sækja símann og herða mig.

Ertu A eða B týpa? BBB týpa

Hælar eða strigaskór? Í augnablikinu á tánum eða í crocks, karlar og konur skulu bara vera í því sem þeim finnst þægilegt. Ég er talsamaður þæginda í skóklæðnaði!

Hvaða tungumál talarðu? Íslensku og ensku, get bjargað mér á dönsku og þýsku.

Hvað ertu að hámhorfa á? Síðasta sem ég hámhorði á var Baby Reindeer!

Fyrsti kossinn? Svona alvöru? Held það hafi verið í SPK heima hjá strák sem ég var skotin í, ég datt aftur fyrir mig. Það var mikið hlegið.

Ertu með einhvern bucket-lista? Fara fyrir hönd Íslands á Feneyjingartvíæringinn, Sýna verk mín í MOMA og Tate Modern, búa um tíma í Suður Ameríku, t.d. Perú og kannski Taílandi.

Ég stefni að því að rækta allan matinn okkar sjálf og svo væri ekki leiðinlegt að verða heimsmeistari í einhverju skemmtilegu. 

Leggja mitt af mörkum til að barnabörnin mín búi við mannréttindi, frið og fái að njóta náttúrunnar okkar, ásamt því að hjálpa ungum listamönnum að fóta sig. Leikstýra kvikmynd sem væri myndlistarverk og skilja eitthvað eftir með listinni minni.

Hvað stendur í síðustu FB-skilaboðunum sem þú sendir? „Úps ég sofnaði, varð að hvíla mig. Var að verja MA verkefnið í dag, ertu vakandi lengi?” Til litlu systur minnar Hönnu sem býr í Kaupmannahöfn.

Uppáhalds staðurinn á heimilinu? Heiti potturinn eða á bólakafi í grjónapúðanum okkar frá Cape Town.

Hvaða lag kemur þér alltaf í gírinn? Queen - Don’t stop me now!

Hin hliðin er vikulegur viðstalsliður hjá Lífinu á Vísi þar sem við fáum að kynnast einstaklingum úr öllum kimum þjóðfélagsins. Ábendingar um viðmælendur má senda á [email protected].