Svar Ís­lands og Sviss við Forrest Gump mætir á skjáinn

„Um leið og ég las bókina þá sá ég þetta fyrir mér á skjánum,“ segir Kristófer Dignus í samtali við Vísi en hann mun sjá um leikstjórn þáttanna. Fyrsta bókin um Kalmann kom út árið 2020 og vakti gríðarlega athygli. Framhaldsbók kom út í fyrra. Joachim hefur búið hér á landi síðan árið 2007 en er upprunalega frá Sviss þar sem Kalmann hefur slegið í gegn.

Kalmann kominn heim

„Mér finnst eins og Kalmann sé kominn heim,“ segir Joachim. „Mér finnst líka mjög mikilvægt að þetta sé íslensk framleiðsla og hjá Kontent er Kalmann kominn í mjög góðar hendur, þar sem í sögunni er bæði húmor og spennu, eitthvað sem Kontent skilur mjög vel.“

Serían verður tekin upp á Raufarhöfn sem er sögusvið fyrstu bókarinnar. Bókin fjallar um Kalmann Óðinsson, sjálfskipaðan lögreglustjóra á Raufarhöfn. Honum er líkt við kvikmyndapersónuna Forrest Gump í tilkynningu frá framleiðendum. Hann gengur um með kúrekahatt og Mauser skammbyssu sem amerískur afi hans komst yfir í Kóreustríðinu.

Kalmann er sérstæður, einfaldur og klókur í senn, sér lífið í kringum sig öðrum augum en annað fólk og er í nánu sambandi við náttúru og umhverfi. En svo hverfur valdamesti maður þorpsins, sem hefur líf þess í hendi sér og virðist flæktur í vafasamt athæfi, Kalmann finnur stærðar blóðpoll við Heimskautsgerðið og allt fyllist af lögreglu og fjölmiðla mönnum sem spyrja óþægilegra spurninga.

Joachim hafði áður sent frá sér þrjár skáldsögur. Kalman hlaut frábæra dóma þegar sagan kom út í Sviss 2020, komst á metsölulista Der Spiegel, hlaut Crime Cologne-glæpasagnaverðlaunin og var tilnefnd til Specsavers-verðlaunanna sem besta frumraunin og Petrona-verðlaunanna sem besta þýdda norræna glæpasagan.

Íslenskara en allt

Kristófer Dignus mun leikstýra þáttaröðinni og skrifar einnig handritið ásamt eiginkonu sinni leikkonunni Maríu Hebu. Kristófer segist þekkja vel til á Raufarhöfn og segir Joachim lesa þjóðarsálina vel í bók sinni.

„Glöggt er gests augað, hann sér okkur Íslendingana eitthvað svo vel og persónurnar í Kalman eru svo frábærar útgáfur af því hve skrítin og furðuleg og rugluð og einstök við erum og Kalman auðvitað sérstaklega, hann er svona ólíklegasta hetjan af öllum en bjargar einhvern veginn málunum á sinn einstaka hátt.“

Sjálfur er Kristófer hálfur Breti og grínast hann með að ljóst sé að hér sé á ferðinni alvöru alþjóðlegt verkefni. Hann segir að það hafi aldrei komið til greina annaða en að taka þættina upp á sögusviði bókarinnar.

„Hann getur hvergi annars staðar verið. Það var víst á tímabili þýskur leikstjóri sem langaði að gera bíómynd úr bókinni en vildi staðfæra hana til Þýskalands og láta hana gerast í þýskum smábæ. Joachim vildi það aldrei, því að þetta yrði að vera hérna á Íslandi og ég er alveg hjartanlega sammála. Þetta er íslenskara en íslenskt þannig að þetta verður að gerast hér!“

Kristófer segir að sér finnist stundum eins og íslenskar sjónvarpsþáttaseríur séru framleiddar fyrir útlenskan markað. Það besta við Kalmann sé hve vel bókin og þar af leiðandi þáttaröðin geti virkað bæði fyrir Íslendinga og útlendinga.

„Ég held að Íslendingar jafnt sem útlendingar eigi eftir að elska þessa sögu. Það þarf ekkert að rembast, þetta er saga sem virkar á báða bóga og út um allt.“

Áskorun að finna réttan leikara

Kristófer segir að ein af stærstu áskorununum verði að finna réttan leikara í hlutverk Kalmanns. Serían muni standa og falla með persónunni.

„Af því að hann er allt í öllu, aðalsöguhetjan og við sjáum heiminn í gegnum augu hans alla seríuna. Það þar því að vanda vel til verka við að finna rétta leikarann og svo vinna með þeim leikara og þróa og móta persónuna.“

Kristófer segist strax hafa farið að velta fyrir sér hver gæti farið með hlutverkið þegar hann las bókina á sínum tíma. Hann heldur spilunum þétt upp að sér en segir framleiðendur vera farna að líta í kringum sig og vera orðna gríðarlega spennta fyrir því að hefjast handa.