Klæðir sig til að líða vel en ekki til að sýna sig

Tískutal er fastur liður á Vísi þar sem rætt er við ólíka einstaklinga um þeirra persónulega stíl og hvernig tíska nýtist þeim í daglegu lífi. Klæðaburður er sannarlega fjölbreytt listform en við fáum að skyggnast inn í ólíka fataskápa og fræðast nánar um það merkilega tjáningarform sem tíska er fyrir hverjum og einum viðmælanda.

Hvað finnst þér skemmtilegast við tískuna?

Það skemmtilegasta við tísku er tjáningin, sköpun, karakterinn og gleðin sem kemur af því að klæða sig vel og finna þá tilfinningu og það sjálfsöryggi sem því fylgir.

Hver er uppáhalds flíkin þín og af hverju?

Uppáhalds flíkin mín er Issey Miyake buxurnar mínar af því að þær eru sjúklega þægilegar, passa við nánast allt og eru einstök hönnun sem stendur út og vekur athygli.

Eyðirðu miklum tíma í að velja föt hverju sinni?

Ég er alltaf búinn að skipuleggja í hverju ég er daginn áður og stundum þrjá til fjóra daga fram í tímann, skapa mood fyrir vikuna og auðvelda mér valið á morgnana.

Hvernig myndirðu lýsa stílnum þínum?

Minn stíll er áberandi, nútímalegur, þægilegur og breytilegur.

Hefur stíllinn þinn breyst mikið í gegnum tíðina og hvernig þá?

Já mjög mikið, ég er alltaf að færast nær og nær klassískum og minimalískum stíl þó mér finnist það mjög mikilvægt fyrir mig að gera öll outfit að mínu, eins og til dæmis með skarti eða aukahlutum. 

Það sem hefur breyst mikið með tímanum er að ég klæði mig til þess að líða vel en ekki til að sýna mig.

Nýturðu þess að klæða þig upp?

Ég elska að klæða mig upp og elska að fara á viðburði eða veislur þar sem ég get tjáð mig með klæðnaði og gert eitthvað skemmtilegt og öðruvísi til að vekja athygli og skemmta mér.

Hvaðan sækirðu innblástur í tískunni?

Ég sæki innblástur í tískusýningar frá helstu merkjum og einstaklingum sem hafa gaman af og þora að tjá sig og skapa sinn eigin stíl. Elska svoleiðis einstaklinga, sem hafa sjálfsöryggið í að vera það sjálft og hafa gaman að tísku.

Ertu með einhver boð og bönn þegar það kemur að klæðaburði?

Mér finnst aðalatriðið að líða vel í því sem þú ert og ekki klæða þig fyrir aðra eða í það sem er í tísku að hverju sinni. Annað mikilvægt atriði er að vera ekki í of miklum merkjavörum í einu heldur nota merkjavörur sem krydd.

Hver er eftirminnilegasta flík sem þú hefur klæðst og af hverju?

Ég hugsa að það sé Burberry dressið sem ég birti með mér og Línu í París, það vakti mikla athygli á sínum tíma. Eða LOEWE gallinn sem fékk fólk til að spyrja mig hvort það væri tölur, dekk eða niðurföll. En það sem ég elska við hönnun og list er að það vekur athygli og tilfinningar.

Býrðu yfir einhverju góðu ráði þegar það kemur að tísku?

Mitt besta ráð við tísku er að eiga grunn (e. basic) hluti eins og gallabuxur, boli, peysur og skyrtur í miklum gæðum og með gott notagildi. Passa að kaupa liti eins og svart, blátt, grátt og brúnt til þess að geta blandað saman flíkum og þá poppað upp með aukahlutum eða meira áberandi litum eða formi.

Hér má fylgjast með Gumma Kíró á samfélagsmiðlinum Instagram.