Gott að taka nokkra daga í að undirbúa breytta svefnrútínu barna og unglinga

Eftir verslunarmannahelgi er þó komið að því hjá flestum fjölskyldum að fara að búa okkur undir rútínuna sem fylgir skólanum og haustinu.

Meðal annars að krakkarnir fari aftur fyrr að sofa.

Mælt er með því að aðlaga börn inn í þessa rútínu á ný. Annars er hætta á að einhver kvöld fari í grát og gnístan tanna.

Því hvernig eiga þau svo sem að fara að sofa klukkan átta eitt kvöldið ef þau hafa sofnað um tíuleytið síðustu vikurnar? Svo dæmi sé tekið.

Mælt er með því að taka breytingarnar í 30 mínútna skrefum. Sem þýðir að ef ætlunin er að barnið fari tveimur tímum fyrr að sofa þegar skólinn hefst, þá séu fjórir til fimm dagar teknir í að aðlaga svefnrútínuna.

Það sama gildir þá um að barnið sé vakið á morgnana.

Þá er gott að draga úr skjátíma í skrefum líka og passa að hann minnki og að ekki sé verið að nota síma eða önnur snjalltæki þegar líður að svefntímanum.

Alls kyns hluti er hægt að gera með þeim yngstu, sem gerir það að verkum að þau eru sáttari við breytingarnar. Bað, náttföt og sögulestur er til dæmis alltaf sígilt ráð.

Krakkarnir sem eru aðeins eldri þurfa öðruvísi aðlögun. En aðlögun samt sem áður. Það er því gott að ræða við yngstu grunnskólabörnin um að nú sé skólinn bráðum að fara að byrja. Því flest börn eru spennt fyrir því og það getur verið partur af tilhlökkun fyrir skólann að fara smátt og smátt fyrr að sofa á kvöldin.

Þegar kemur að unglingsaldrinum er langbest ef foreldrarnir sýna gott fordæmi og koma sinni svefnrútínu líka í rétt horf, en bíða ekki þar til sumarfríinu lýkur eða skólar hefjast. Hér er ekkert síður mikilvægt að setja sér markmið í hægum skrefum.

Mikilvægt er síðan að raska ekki svefnrútínunni aftur um helgar.

Enn eitt atriðið sem gott er að hafa í huga eru matarvenjur. Oft riðlast þær líka yfir sumartímann en til að undirbúa börnin okkar sem best fyrir skóla- og haustrútínuna, er gott að ná tökum á því að kvöldmatur og matartími sé kominn í rétt horf á heimilinu.

Svefnþörf miðað við aldur er tilgreindur á Heilsuveru sem hér segir:

Aldur 1-2 ára: Ellefu til fjórtán klukkustundir

Aldur 3-5 ára: Tíu til þrettán klukkustundir

Aldur 6-13 ára: Níu til ellefu klukkustundir

Aldur 14-17 ára: Átta til tíu klukkustundir

Svefnþörf fullorðinna eru sjö til níu klukkustundir á nóttu.

Fyrir yngstu börnin má lesa nánar um góð ráð HÉR (á ensku).

Fyrir grunnskólabörn og unglinga má lesa nánar um góð ráð HÉR (á ensku).