Rannsókn: Æskilegasta aldursbil hjóna

Eða hvað?

Aldursbil para og hjóna hefur auðvitað verið rannsakað eins og flest annað. Ein þeirra sem hvað mest hefur verið fjallað um er rannsókn sem Emory Háskólinn í Atlanta í Bandaríkjunum stóð fyrir og um þrjú þúsund einstaklingar tóku þátt í. 

Samkvæmt niðurstöðum þessarar rannsóknar er æskilegasta aldursbil hjóna núll til þrjú ár. Um leið og aldursbilið er orðið meira, aukast líkurnar á skilnaði.

Þannig eru líkurnar á skilnaði 18% meiri ef aldursbil hjóna er fimm ár en þetta hlutfall hækkar í 39% ef aldursbilið eru tíu ár.

Þá sýndu niðurstöður að ef aldursbil hjóna er tuttugu ár, eru 95% líkur á skilnaði.

Til viðmiðunar eru líkur á skilnaði aðeins 3% ef aldursbil hjóna eru eitt ár.

Almennt virðast samfélög frekar samþykkja aldursbil þegar karlmaðurinn er eldri en konan. Jafnvel töluvert eldri eins og mörg dæmi frá Hollywood sýna. Sem dæmi má nefna Robert De Niro sem er 79 ára og eignaðist síðastliðið vor barn með 45 ára gamalli kærustu sinni. De Niro var áður í hjónabandi í tæplega þrjátíu ár með sömu konunni, en hans fyrrverandi er tólf árum yngri en hann.

Þá má nefna Leonardo DiCaprio sem þrátt fyrir að vera að nálgast fimmtugt sjálfur, er sagður forðast það eins og heitan eldinn að slá sér upp með konum sem eru eldri en 25 ára.

Þekkt samband er líka hjónaband Emmanuel Macron Frakklandsforseta en hann er 45 ára en eiginkonan hans er sjötug. Macron hefur sjálfur sagt í viðtölum að ef hann væri giftur konu sem væri tuttugu og fimm árum yngri en hann, en ekki öfugt, væri aldursmunurinn mun minna á milli tannanna á fólki en raun ber vitni.

Þegar kemur að því að rýna í hverjar ástæðurnar eru sem auka líkurnar á skilnaði ef aldursmunurinn er mikill, eru þessi atriði helst nefnd:

• Heilsutengdur munur, öldrun eða veikindi, ef aldursbil er mikið
• Forgangsröðun, áhugamál og helstu áherslur geta verið ólíkar ef aldursmunur er mikill
• Áhugi á barneignum.

Þá sýna niðurstöður rannsóknar sem gerð var um sama efni í Ástralíu árið 2017 að ánægja fólks í sambúð minnkar hraðar fyrstu sex til tíu ár hjónabandsins hjá pörum sem eru á mismunandi aldri, í samanburði við hjón sem eru á svipuðum aldri. Þessi rannsókn náði aðeins til gagnkynhneigðra para.

Niðurstöður áströlsku rannsóknarinnar rýma við þá sem gerð var í Bandaríkjunum því að samkvæmt niðurstöðum hennar, minnkar sambúðaránægja fólks minnst fyrsta áratuginn hjá pörum þar sem aldursmunurinn eru þrjú ár eða skemur. Þó kemur fram að það á þá við um sambönd þar sem karlmaðurinn er þá eldri aðilinn. Sambúðaránægjan minnkar síðan hraðar þegar aldursbilið er orðið fjögur til sex ár, enn meir ef aldursbilið er sjö ár eða meira og koll af kolli.