Sjálfið okkar: Að sporna við morgunfúlindum

Sumir vilja ekki tala við neinn. Fyrr en kannski um tíuleytið.

Sumir hreyta í annað fólk. Segja ekki einu sinni góðan daginn.

Sumir eru með augabrýrnar svo langt niður að ekki einu sinni ókunnugir vilja sitja við hliðina á þeim í strætó.

Dæmin eru fjölmörg og sem betur fer eigum við oft auðvelt með að gera grín að okkur sjálfum í þessu.

En auðvitað vill enginn vera morgunfúll!

Því hvað er gaman við það?

Hér eru nokkur góð ráð sem gætu hjálpað.

Svefnrútínan: Númer eitt, tvö og þrjú er að koma svefnrútínunni í lag og passa upp á að þú sofir nægilega vel. Sjö til átta tíma hið minnsta en þetta veistu nú þegar.

Kíkjum því á nokkrar aðrar hugmyndir líka, jafnvel einhverjar sem eru aðeins út fyrir boxið. Hvernig væri að taka 7-10 mínútur í eftirfarandi morgunverk:

Að skrifa í dagbók.

Að hugleiða.

Að skrifa setningu sem endurspeglar hvernig þig langar til að þér líði í dag.

Að taka tímann á því hversu lengi þú ert fram úr og að hafa þig til. Setja þér markmið um að a) vera fljótari eða b) gefa þér lengri tíma.

Að undirbúa það kvöldið áður að þú ætlir að borða einhvern morgunmat sem þér finnst mjög góður. Ekki ákveða þetta að morgni og fatta þá að það er ekkert til nema kornflex.

Að gera verkefnalistann þinn fyrir daginn.

Að vera búinn að gera persónulegan markmiðalista og byrja morgnana á því að skrifa niður þau atriði sem þér finnst ganga vel, þér finnst þú vera að ná árangri í eða þau atriði þar sem þér finnst þú nýta styrkleikana þína vel.

Að vera með mismunandi morgunverk miðað við mismunandi daga vikunnar. En öll þó þannig að þau séu líkleg til að koma þér í gott skap.

Að koma fjölskyldumeðlimum á óvart með því að vera hress og jafnvel á undan öðrum á fætur.

Að leita ráða hjá morgunhressum vinnufélögum, hvernig þeir fara að þessu.

Að gera smá grín af sjálfum þér og opinbera að þú sért í átaki gegn morgunfúlindunum og þurfir aðstoð með gleði og hlátri!

Að búa til mælanleg markmið um hvernig þér er að ganga. Taka verkefnið föstum tökum eins og fagmaður og hafa gaman af því um leið. SMART eða SVÓT greiningu á þetta eða?

Að búa til þínar eigin frábæru hugmyndir sem þú telur að virki fyrir þig.

Aðalmálið er að horfast í augu við það að morgunfúlindi eru hundleiðinleg: Fyrir börnin þín, makann þinn, vinnufélagana og sjálfið þitt. 

Þannig að hvers vegna ekki að leita leiða til að breyta þessum vana, í stað þess að trúa því að morgunfúlindi séu óhagganleg staðreynd?