Synapse: Hugarorkan ræður ríkjum í Sýndarveruleika

Í Synapse setur maður sig í spor einhvers konar hugarnjósnara, sem fer inn í huga annars manns með því markmiði að finna þar leyndarmál og koma í veg fyrir hryðjuverkaárás. Fyrst þarf maður þó að brjóta sig í gegnum varnir hugans.

Það getur maður gert með byssum og með hugarorkunni. Hugmyndin hentar sýndarveruleika einkar vel, þar sem maður notar hendurnar og höfuðhreyfingar til hins ítrasta. 

Óvinum kastað til og frá

Sýndarveruleikabúnaður PlayStation skynjar hvert maður horfir og getur maður gripið kassa, tunnur og óvini með hugarorkunni. Kössunum getur maður kastað í drullusokka eða notað til að skýla sér frá skothríð óvina. Hægt er að grípa óvini og slengja þeim í loftið, jörðina eða kasta þeim langar vegalengdir. Einnig er hægt að draga þá úr skjóli með hugarorkunni og skjóta þá.

Tunnur getur maður sprengt í loft upp með því að kremja þær en einnig er hægt að kasta þeim inn í hóp óvina og sprengja þær svo. Þetta er hluti af þeim leiðum sem spilarar geta beitt til að komast í gegnum óvini í Synapse en það er mjög gaman að finna fjölbreyttar leiðir í gegnum borð leiksins.

Ein besta lýsingin sem ég hef lesið um Synapse er að manni líður eins og Jedi-Riddara með byssu. Það finnst mér mjög góð lýsing. Jean Grey með byssu kemur einni til greina. Það er allavega gaman að kasta óvinum á loft og skjóta þá svo er þeir falla til jarðar.

Leiknum er stillt upp í þrjá hluta sem skipast upp í níu borð hver. Ef maður deyr, þarf maður að byrja upp á nýtt á borðunum níu en í hverjum hluta leiksins verða óvinirnir öflugari og erfiðari viðureignar. Maður getur þó notað reynslupunkta sem maður safnar til að betrumbæta sig, svo maður eigi auðveldara með að komast í gegnum leikinn.

Maður fær betri vopn, aukna getu til að fleygja óvinum til og frá með hugarorkunni og aukið líf, svo eitthvað sé nefnt. Í hverju borði getur maður keypt betri vopn en í lok hvers borðs getur maður einnig valið uppfærslu á kröftum hetjunnar, eins og það að byssukúlur geti farið í gegnum óvini, þeir verði fyrir meiri skaða þegar þeim er kastað með hugarorku og svo framleiðis.

Leikurinn lítur vel út. Umhverfið er stílhreint og flott en leikurinn er að mestu svarthvítur. Ég hef engu yfir að kvarta þar fyrir utan þá hina sömu endurtekningu sem ég hef kvartað yfir áður. Borðin níu, sinnum þrír, eru öll þau sömu þannig að umhverfið breytist aldrei.

Samantekt-ish

Synapse er einn af mínum uppáhalds sýndarveruleikaleikjum hingað til. Hann er hraður og skemmtilegur, þó hann geti verið einsleitur. Það hjálpar þó til að þegar maður spilar sömu borðin aftur, er maður að gera það með ný vopn eða hæfileika í pokahorninu.

Skynjarar PSVR 2 sem fylgast með auga manns virka eiginlega merkilega vel. Ég lenti eiginlega aldrei í veseni með hvað ég var að reyna að taka upp með hugarorkunni. Græjan skynjar meira að segja þegar maður reynir að rífa upp mann sem er að skýla sér á bakvið kassa sem einnig er hægt að lyfta.

PSVR 2 eigendur landsins, og annars staðar, þegar út í það er farið. Ættu ekki að verða fyrir vonbrigðum með Synapse.