„Myndi ekki vilja láta finna mig dauða í ýmsum flíkum“

Tískutal er fastur liður á Vísi þar sem rætt er við ólíka einstaklinga um þeirra persónulega stíl og hvernig tíska nýtist þeim í daglegu lífi. Klæðaburður er sannarlega fjölbreytt listform en við fáum að skyggnast inn í ólíka fataskápa og fræðast nánar um það merkilega tjáningarform sem tíska er fyrir hverjum og einum viðmælanda.

Hvað finnst þér skemmtilegast við tískuna?

Skemmtilegast finnst mér sjálfsagt hvernig tískan fer í hringi. Aftur og aftur.

Ég hef alltaf elskað fatnað og skó og mér finnst gaman að tjá mig í klæðavali. Það er hægt að segja svo mikið eða lítið með litum, áferðum, sniðum og mismunandi samsetningum.

Mér finnst tíska ótrúlega áhugaverð og mér finnst sjúklega gaman að fylgjast með straumum hennar í einu og öllu, þó það sé ekki alltaf fyrir mig og ég er alls ekki alltaf í takt við hana.

Hver er uppáhalds flíkin þín og af hverju?

Ég get ekki valið eina flík en ég elska til dæmis allar fallegu yfirhafnirnar mínar frá uppáhalds merkinu mínu AOC Fashion.

Eyðirðu miklum tíma í að velja föt hverju sinni?

Ég vinn við að velja og hanna fatnað sem búningahönnuður svo það er óhætt að segja að ég eyði miklum tíma í það. Ég hugsa mjög mikið um föt og elska föt mögulega vandræðalega mikið.

Þegar kemur að því að velja föt á sjálfa mig tek ég yfirleitt ákvarðanir um fataval morgundagsins á koddanum kvöldið áður og það er ekki lengi gert.

Hins vegar eru fjórir dagar í hverjum mánuði þar sem ég kemst varla úr húsi og ég bara get alls ekki klætt mig. Ég set allt á hliðina í fataskápnum mínum, ríf allt út úr honum og finnst allt ómögulegt og ógeðslega ljótt og þá er gott að eiga góðan jogging galla á kantinum.

Hvernig myndirðu lýsa stílnum þínum?

Bland í poka með remúlaði.

Hefur stíllinn þinn breyst mikið í gegnum tíðina og hvernig þá?

Stíllinn minn eða lack there of hefur verið frekar konsistant í gegnum tíðina myndi ég segja.

Ég hef alltaf verið sjúk í gallaefni, hvíta stuttermaboli, skemmtilega hæla, strigaskó, jogging galla, pelsa og varaliti.

Gallabuxurnar, skórnir og liturinn á vörunum breytist vissulega með tíð og tíma en ég myndi segja þetta vera frekar beisik hjá mér.

Hvaðan sækirðu innblástur í tískunni?

Meðvitað er ég ekki að sækja tísku innblástur í eitthvað ákveðið en ég verð vissulega fyrir áhrifum alls staðar að.

Ég skoða tísku mikið í símanum og svo á ég á sjúklega mikið af vinkonum sem skvísa reglulega yfir sig og við sendum tískumyndir, góðar og slæmar, okkar á milli sjálfsagt daglega.

Ertu með einhver boð og bönn þegar það kemur að klæðaburði?

Ég er 100% með boð og bönn. Ég hef ótrúlega sterkar skoðanir þegar kemur að klæðaburði, korter í anal. 

Ég myndi ekki vilja láta finna mig dauða í ýmsum flíkum en ég þori ekki að telja þær upp hér.

Hver er eftirminnilegasta flík sem þú hefur klæðst og af hverju?

Eftirminnilegasta flíkin er sjálfsagt samfestingur sem ég hannaði á sjálfa mig fyrir Cannes Film Festival og lét sauma fyrir hátíðina.

Býrðu yfir einhverju góðu ráði þegar það kemur að tísku?

Mikilvægast finnst mér að hlusta á hjartað og dagsformið þegar kemur að fatavali. Vellíðan er lykill. 

Við berum það með okkur þegar okkur líður vel í fötunum okkar og getum þá verið glæsileg í hverju sem er.

Í dag vanda ég valið þegar ég fjárfesti í fatnaði. Ég kaupi mér færri flíkur og góðar. Það er dýrmætt að eiga klassískar flíkur úr góðum efnum sem standast tímann í skápnum sínum. Slíkum flíkum er hægt að raða saman á marga mismunandi vegu ár eftir ár og krydda með skemmtilegum aukahlutum og skarti.

Ég hvet alla til að styrkja íslenska hönnun. Við eigum svo mikið af flottum fatahönnuðum sem eru að gera frábæra hluti. Einnig mæli ég með að fólk kaupi sér föt og skó sem eru framleidd af fullorðnu fólki í góðum aðstæðum.

Svo get ekki mælt nógu mikið með því að versla notað sem er líka oft betra fyrir budduna.

Að versla notaðar flíkur getur verið svo ótrúlega skemmtilegt og spennandi. Fjársjóðsleit, ég elska það. 

Ef þú finnur flík sem þér finnst falleg en passar ekki mæli ég með að fara með hana til klæðskera og gera hana að þinni.

Ég elska „hagkerfi kvenna“ eins og vinkona mín kallar það, að deila fötum og skiptast á að vera skvísa í sömu flíkinni.

Ég verð einmitt með nytjamarkað á morgun klukkan 13:00 fyrir áhugasama í Stúdíó Lovetank, Fiskislóð 31F, með Tinnu vinkonu minni, þar sem við ætlum að losa okkur við gömul gull.