Uppgötvaði líkamann sinn upp á nýtt

Hylki fyrir aðra manneskju

Blaðamaður tók púlsinn á Þyri Huld og fékk að heyra nánar frá verkinu.

„Ég uppgötvaði líkamann minn svo mikið upp á nýtt þegar ég sá hann breytast og verða hylki fyrir aðra manneskju til að verða til. Innblásturinn kemur út frá líkamanum og hvernig ég hreyfi mig á mismunandi tímabilum í lífi mínu. Mínar tilfinningar eru í hreyfifærni líkama míns.“

Í Covid varð Þyrí ólétt af sínu öðru barni.

„Að vera ólétt og vinna sem dansari passar oft ekkert voðalega vel saman en þarna small það saman. Við gátum ekki verið að sýna eða ferðast um heiminn sem Íslenski dansflokkurinn gerir mikið, þannig allir dansararnir í flokknum fengu tækifæri til að gera vídeó verk.“

Sköpunargleði og skemmtilegar æfingar

Í kjölfarið fékk Þyri öflugan hóp kvenna til liðs við sig.

„Ég talaði við Sögu Sig, mig hafði alltaf dreymt um að vinna með henni og hún var til í að gera vídeó með mér. Ég var komin 27 vikur þegar við tókum vídeóið og Urður Hákonardóttir ofurkona gerði tónlistina. Síðan opnaði leikhúsið aftur og dansflokkurinn var með kvöld þar sem við vorum að sýna alls konar lítil verk. 

Þar ákvað ég að gera lifandi útfærslu af vídeóinu komin 38 vikur á leið en eftir það kviknaði hugmyndin hjá mér að taka þetta lengra. Sækja um styrk og gera verk um þessa hringrás sem lífið er.“

Verkið Hringrás er unnið í samstarfi við Íslenska dansflokkinn, Urði Hákonardóttur tónskáld, Júlíönnu Láru Steingrímsdóttur búninga- og leikmyndahönnuð og Sögu Sigurðardóttur ljósmyndara, sem sér um myndbandsinnsetningu í sviðsmynd.

„Ég, Saga, Urður og Anni unnum saman í þessu fyrsta vídeó verki sem ég gerði fyrir dansflokkinn. Síðan bættust Júlíanna, Aðalheiður og Elísabet við og ekki má gleyma Pálma sem kemur og lýsir okkur upp. Ég hef áður unnið með öllum sem koma að verkinu, en ekki í einu. Það er mjög gaman á æfingum hjá okkur, mikil sköpunargleði og þetta er allt töfrafólk á sínu sviði. 

Hugmyndin að þessum hóp kemur frá mér, ég valdi fólk sem gefur mér góða orku og ég lít upp til í lífinu.“

Hugmyndavinnan hófst á meðgöngu

Þyri Huld hlaut grímuna sem dansari ársins árið 2015 og 2018 fyrir hlutverk sín í verkunum Sin og Hin lánsömu. Hún hóf feril sinn hjá Íslenska dansflokknum árið 2010 og hefur tekið þátt í fjölbreyttum verkefnum sem dansari og danshöfundur síðan.

Þá hefur hún samið þrjú verk um ofurhetjurnar Óð og Flexu í samstarfi við Hannes Þór Egilsson á árunum 2014-2018, sem hlutu tilnefningar í flokkunum barnasýning ársins og danshöfundur ársins.

Hún segist ómeðvitað hafa byrjað að vinna að Hringrás fyrir tveimur árum.

„Yngri strákurinn minn er núna eins og hálfs árs. Þetta byrjaði þegar hann var inn í mér en við Saga tókum líka vídeó af okkur þegar hann var tveggja mánaða. Síðan fékk ég styrk frá sviðslistasjóði og samstarf við Íslenska dansflokkinn og þá fór allt að rúlla.

Við erum búnar að vera að safna að okkur myndefni og ég hef verið að kynnast líkamanum mínum aftur eftir að hafa eignast tvö börn. 

Það er svo magnað hvernig líkaminn breytist, ég finn fyrir meiri jarðtengingu og betri hlustun. Ég heyri í honum og við vinnum saman.“

„Hljóð sem ég hef ekki heyrt frá mér áður“

Í listsköpun sinni vinnur Þyri mikið með tilfinningar.

„Það eru mjög sterkar tilfinningar sem ég upplifði á meðgöngu, að fæða barn og vera í fæðingarorlofi. Það er þessi jörð, að finna líkamann ýta út barni með hljóðum sem ég hef ekki heyrt frá mér áður. Svefnleysi, muna ekkert en þurfa samt alltaf að vera til staðar og síðan frelsið að komast aftur í líkamann minn og verða ég.

Ég vinn verkið út frá þessum tilfinningum. 

Ég hef líka gaman að því að sjá hversu langt líkaminn minn kemst eins og í liðleika og styrk. Ég er alltaf að ögra sjálfri mér á góðan hátt, þróa mig áfram.“

Man ekki eftir sér nema í dansi

Þyri hefur æft dans frá blautu barnsbeini og segist ekki muna eftir sér nema í dansi.

„Ég finn alltaf fyrir meiri og meiri ástríðu eftir því sem ég eldist. Ég lít öðruvísi á dansinn, mér finnst hann svo magnað tjáningar form. Þú þarft ekki tungumál heldur bara líkamann sem þú fæðist með. Ég elska að finna eitthvað nýtt í dansinum, stækka hreyfibankann minn og verða fyrir áhrifum.“

Hún segist finna fyrir mikilli aukningu í aðsókn á danssýningar undanfarið.

„Dansinn blandast svo vel við önnur listform og er oft algjört konfekt fyrir augað. Alveg hægt að gleyma stund og stað.“

Öndunaræfingar og falleg orð

Þrátt fyrir að vera þaulreynd í að koma fram segist hún alltaf finna smá fiðrildi í maganum áður en hún stígur á svið.

„Mér finnst það gott því þá veit ég að ástríðan er enn þá til staðar og það að fara á svið er ekki hversdagslegt. Ég er samt frekar róleg manneskja og tala mikið við sjálfan mig í huganum.“

Hugleiðsla er partur af morgunrútínunni hjá Þyri, sem leggur einnig mikla áherslu á mataræðið. 

„Ég geri alltaf nokkrar öndunar æfingar og segi falleg orð við sjálfa mig. Ég hugsa líka mikið um hvað ég set ofan í mig. Vel mat sem gefur mér orku en tekur hana ekki frá mér. 

Ég reyni líka að rækta og setja ást í matinn minn. Ég spíra mikið heima, geri súrkál með manninum mínum og hummus. Fyrir sýningar set ég svo á mig heyrnartól, hlusta á góða tónlist og dilla mér við,“ segir Þyri Huld að lokum.

Hér má finna nánari upplýsingar um sýninguna.