Ýta við stjórnvöldum með hönnunarkeppni um tákn fyrir íslensku krónuna

HönnunarMars fer fram 4. til 8. maí næstkomandi og á hátíðinni verður sýning á hugmyndum sem berast í þessa nýju keppni sem haldin á vegum FÍT, Félags íslenskra teiknara.  Gísli segir að hugmyndin með þessu verkefni sé að hefja umræðuna um tákn fyrir íslensku krónuna.

„Við fórum af stað núna því við áttum mjög gott samtal við Seðlabankann og voru þeir tilbúnir til að styrkja verkefnið svo við gætum gert þessa hugmyndsamkeppni að veruleika.“

En af hverju á íslenska krónan ekki sitt eigið tákn?

„Í raun er það hlutverk hvers og eins land að sækja um til Unicode pláss fyrir sitt tákn í þeirra grunni — sem meðal annars inniheldur öll emoji táknin,“ útskýrir Gísli. 

„Flest öll stóru fyrirtækin sem vinna með einhverkonar letur meðhöndlun og framleiðslu á búnaði með ritvinnslu eins og til dæmis Adobe, Apple, Facebook, Google, IBM & Microsoft styða til dæmis við þennan grunn. Nýjustu gjaldmiðla merkin sem hafa verið samþykkt eru Bitcoin og Som frá Kirgistan sem bættust við árið 2017.“

Lúta sömu lögmálum og gott merki

Gísli segir að í gegnum árin hafi margir hönnuðir hugsað um þetta verkefni. 

„Við erum að fá sterk viðbrögð við samkeppninni, stundum þarf bara sterkt félag eins og FÍT til að ýta við stjórnvöldum til að taka þetta áfram.“

Að hans mati er ýmislegt sem einkennir gott tákn fyrir gjaldmiðil.  

„Peningatákn er í grunnin eins og stafur í stafrófi frekar heldur en merki. Peningatákn þarf að vera nægilega einkennalaust að það sé hægt að aðlaga það mörgum ólíkum letur týpum og letur vigtum. Samt sem áður lúta svona merki sömu lögmálum og gott merki, það þarf að vera læsilegt í smáum stærðum og helst gefa til kynna fyrir hvað það stendur á einhvern hátt.

Gísli hefur aðeins legið yfir peningatáknum síðustu misseri í tengslum við þessa keppni og er eitt merki komið í persónulegt uppáhald. 

„Eftir að við byrjuðum með verkefnið hefur maður kafað aðeins dýpra í merkinu og er Pundið að koma sterkt. Sagan á bakvið táknið er löng löng, táknið er komið úr latneska orðinu libra sem þýðir vigt. Sjálft táknið er líka fallegt og passar vel inn í formheim leturhönnunar án þess að vera í lattneska stafrófinu.“

Fyrsta tilraun til þess að innleiða táknið

Keppninn er einungis í boði fyrir félagsmenn FÍT. Öll innsend verk eru dæmd nafnlaust af fjögurra manna dómnefnd, þrír skipaðir af FÍT og einn af Seðlabanka Íslands. Staðfestir í dómnefnd eru Atli Hilmarsson, FÍT og Gísli B. Björnsson, FÍT

„Félagsmenn hafa fengið sendan link í tölvupóst á nýtt innsendingarkerfi FÍT og skrá þau táknið þar inn ásamt 50 til 200 orða texta með innsendingunni. Heimilt er að senda inn fleira en eina tillögu.“

Úrslitin verða kynnt formlega 5. maí með smá opnun, en sýningin á HönnunarMars mun vera opinn almenning frá 4. maí. Vinningshugmyndin verður þó ekki sett sett strax í notkun. 

„Nei því miður, ekki að svo stöddu. Keppninn er hugsuð til að ýta við stjórnvöldum og með því að sýna nokkrar tillögur þá fá við fólk til að eiga samtalið um verkefnið og spyrja sig af hverju við eigum ekki tákn fyrir okkar gjaldmiðill. En verkefnið er hugsaði sem fyrsta tilraun til þess að innleiða tákn fyrir íslensku krónuna. Það gæti síðan vel verið að eitthvað af merkjunum kæmu til greina eftir nokkur ár.“

Á döfinni hjá FÍT er síðan að opna FÍT sýninguna 4. maí sem er verðlauna sýning frá FÍT hátíðinni þar sem það besta úr grafískri hönnun og myndlýsingum er verðlaunað. Sýning mun opna á Hönnunarmars í Hafnartorgi, þar deilir FÍT rými með Grapíku og Iðn- og Vöruhönnunarfélaginu.

Nánar má lesa um dagskrá HönnunarMars í ár á vef hátíðarinnar.