Full Spectrum Warrior

Margir rauntíma hernaðarleikir hafa litið dagsins ljós undanfarin ár með misjöfnum áherslum og útkomum. Full Spectrum Warrior er sérstakur leikur í þessum geira. Hann er í raun æfingaleikur hannaður sérstaklega fyrir Bandaríska herinn til að þjálfa hermenn í baráttu á strætum Íraks. Leikurinn kennir hermönnum að meta hættu og bregðast við umhverfinu. Tvö teymi Alpha og Bravo þurfa að vinna saman til að halda lífi í hermönnum teymanna og tapast leikurinn ef einhver liðsmaður fellur. Umgjörð Spilarinn stýrir teymunum í rauntíma og fær aðstoð annarra deilda í hernum í erfiðum aðstæðum. GPS kerfi hjálpar teymunum að nálgast óvinasvæði úr mismunandi áttum og hægt er að biðja um eftirlitsþyrlu til að staðsetja óvini nákvæmlega. Þegar liðsmaður særist í skotbardaga þarf að flytja hann til sjúkraliða fyrir utan bardagasvæðið. Það tekur sjúkraliðann nokkrar sekúndur að tjasla hermanninn saman þannig að hann verði hress og kátur og tilbúinn í slaginn aftur. Það dregur úr raunveruleikagildi leiksins en sjálfsagt skiljanlegt miðað við að Bandarískir hermenn spila leikinn mikið og herinn vilji ekki sýna dauðsföll hermanna. Spilun Verkefnin í leiknum eru oft á tíðum keimlík en inn á milli eru þrælspennandi hasarverkefni. Leikurinn ber með sér ýmsa galla eins og að hermennirnir ganga í gegnum hvorn annan og jafnvel í gegnum farartæki eins og draugar og einstaka sinnum festast þeir. Hermennirnir eiga stundum í vandræðum að skjóta óvini af stuttu færi í beinni sjónlínu. Grafík og hljóð Grafíkin er sæmileg og umhverfið ber með sér óspennandi yfirbragð. Hljóðsetningin  er ágæt en skipanir til liðsmanna Alpha og Bravo verða pirrandi til lengdar. Tónlistin er með hernaðarlegum undirtón sem má heyra í annarri hverri Amerískri stríðsmynd. Þrátt fyrir að ýmislegt sé misfarið í þessum leik þá náði hann ágætis tökum á mér. Metnaðurinn í að klára verkefnin án teljandi meiðsla varð að lykilatriði og framvinda stríðsins varð forvitnilegra með hverju verkefninu. Alveg ágætis afþreying fyrir rauntíma hernaðarleikjaspilara og góð innsýn inn í vinnubrögð Bandaríska hersins. Niðurstaða: Stríðshermir hannaður fyrir Bandaríska herinn. Rauntíma hernaðarleikur sem gerist í Mið Austurlöndum í dag. Gallaður leikur sem er annars ágætis afþreying. Leikjabúnaður:  PC Framleiðandi:     Pandemic Studios Útgefandi:          THQ