„Hún sá mig fyrst í Idolinu“

Parið hefur verið saman í nokkra mánuði eða um hálft ár í nóvember. Að sögn Kjalars einkennist samband þeirra af opnum samtölum og nýjum upplifunum.

„Við erum bæði með mjög opinn hug og höfum sýnt hvort öðru mikið nýtt. Við tölum saman um allt á milli himins og jarðar og ég verð aldrei þreyttur á því,“ segir Kjalar.

„Við erum svo fullkomlega ólík á sumum stöðum og fullkomlega lík á öðrum, mér finnst það æði.“

Kjalar situr fyrir svörum í liðnum Ást er. 

Fyrstu kynni: Hún sá mig fyrst í Idolinu og fylgdi mér á Instagram, ég henti auðvitað í „follow back.”

Lýstu kærustunni þinni í þremur orðum? Hugulsöm, falleg og metnaðarfull.

Mér finnst rómantískt stefnumót vera: Góður heimatilbúinn matur. Það er svo geggjað að elda saman. Ég er sjúklega mikil matarmanneskja og elska að borða góðan mat. 

Annars er það að njóta samveru hvors annars á stefnumótinu, njóta samræðanna og þagnarinnar. - Fyrsta deitið okkar var stanslaust spjall í sex klukkutíma, geggjuð byrjun.

Fyrsti kossinn okkar: Það var í lok fyrsta deitsins. Við þorðum hvorugt að gera neitt allt deitið og svo stalst ég í einn við útidyrahurðina. Hann var reyndar ekkert meira en mömmukoss, krúttlegur og lítill. 

Uppáhalds rómantíska kvikmyndin mín er: La La Land.

Uppáhalds break up ballaðan mín er: For No One — Bítlunum.

Lagið okkar: Elska þig - Mannakorn.

Maturinn: Serrano, algjör„go-to“ þegar við vitum ekki hvað við viljum borða og eigum ekkert til. 

Fyrsta gjöfin sem ég gaf kærustunni minni: Skart sem ég kom heim með úr ferðalagi. 

Fyrsta gjöfin sem kærastan mín gaf mér: Ég talaði um að mig langaði í sérstaka týpu af náttfötum, svo sirka viku seinna gaf hún mér svoleiðis, ótrúlega krúttlegt. 

Kærastan mín er: Ótrúlega traust manneskja, góð og falleg að innan sem að utan, algjör sykurmoli og staðföst í því sem hún gerir. 

Hafði aldrei kynnst manneskju sem stendur svona mikið með sínu og veit alltaf hvað henni finnst, mikil fyrirmynd.

Hvað gerið þið til að gera ykkur dagamun? Ég elska að fara í sund og hef fengið hana oft með mér. Við förum á tónleika eða í leikhús, ég elska hvað við erum bæði til í að prófa alls konar nýjar upplifanir með hvoru öðru.

Rómantískasti staður á landinu: Tjaldsvæðið Kleif við Kirkjubæjarklaustur, mjög kósý og rómó.

Ást er .. Samskipti, hamingja og öryggi. 

Idol-stjörnuleit hefst á morgun

Kjalar skaust upp á stjörnuhimininn eftir að hafa heillað íslensku þjóðina upp úr skónum með sinni einstöku rödd í Idol-stjörnuleit í byrjun árs. Í dag starfar hann sem söngkennari auk þess kemur hann fram á hinum ýmsu viðburðum.

Ný þáttaröð af Idol hefst 24. nóvember á Stöð 2 og munu dómararnir fjórir snúa aftur á skjáinn, Þau Birgitta Haukdal, Herra Hnetusmjör, Daníel Ágúst og Bríet setjast öll aftur í sæti dómara. 

Fyrstu upptökur fyrir nýju þáttaröðina fara fram í lok ágúst. Í maí síðastliðnum fóru prufur fram víðs vegar um land og var þátttakan glæsileg.

Kjalar flutti portúgalska Eurovision lagið Amar Pelos Dois í sinni fyrstu áheyrnarprufu fyrir Idol.