„Í dag finnst mér kven­legur fatnaður ekki síður vald­eflandi“

Tískutal er fastur liður á Vísi þar sem rætt er við ólíka einstaklinga um þeirra persónulega stíl og hvernig tíska nýtist þeim í daglegu lífi. Klæðaburður er sannarlega fjölbreytt listform en við fáum að skyggnast inn í ólíka fataskápa og fræðast nánar um það merkilega tjáningarform sem tíska er fyrir hverjum og einum viðmælanda.

Hvað finnst þér skemmtilegast við tískuna?

Tíska er ákveðið listrænt tjáningarform sem allir eru þátttakendur í meðvitað eða ómeðvitað. Fatnaður er eins konar vettvangur þar sem sköpunargleði fær alltaf að njóta sín sama hvar, hvort sem það er á ferkantaðri skrifstofu eða í listnámi. Það er ánægjulegt að fylgjast með því hvernig fólk tjáir sig á ólíkan hátt í gegnum tískuna, sumir vilja vekja athygli á sér en aðrir falla inn í hjörðina.

Tísku fylgir ákveðinn lestur, við erum dæmd út frá því hverju við klæðumst en við höfum valið. Við getum valið hvaða týpur við erum og hvaða hóp við tilheyrum. Svo eru þau sem þora að standa út og fara algjörlega út fyrir boxið, það er dásamlegt. Tíska getur þar af leiðandi verið notuð sem vopn gegn fyrirmótuðum hugmyndum.

Hver er uppáhalds flíkin þín og af hverju?

Það eru nokkrar flíkur sem ég læt aldrei frá mér og get alltaf reitt mig á en þær eru; bomberjakki frá House of Sunny, svartir Adidas samba og lágar, svartar gallabuxur frá True Religion sem ég fann í Verzlanahöllinni á Laugavegi. 

Mikilvægasti hlutinn af dressinu eru hins vegar hringarnir mínir sem eru bæði gull- og silfurlitaðir. Ég fer aldrei út úr húsi án þeirra. Hringurinn frá Vivienne Westwood er þar í miklu uppáhaldi en hann lítur út eins og spilastokkur.

Eyðirðu miklum tíma í að velja föt hverju sinni?

Ég er alls ekki morgunmanneskja þannig ef ég þarf að fara snemma í skólann eða vinnuna þá verð ég að velja dressið kvöldið áður. Annars hendi ég mér yfirleitt í eina af fyrrnefndum uppáhalds flíkum og set á mig hringina. Ef það er eitthvert tilefni, jafnvel þó það sé bara bæjarrölt, og ég hef tíma þá finnst mér gaman að dressa mig upp. Hvaða áfangastað sem er má líta á sem tískusýningu þar sem þú ætlar að skilja fólk eftir agndofa.

Hvernig myndirðu lýsa stílnum þínum?

Ég á mjög erfitt með að lýsa fatastílnum mínum af því hann er svo fjölbreyttur en ég reyni alltaf að vera spes og er óhrædd við að leika mér. Markmið mitt er yfirleitt að ná að vera „hallærislega-töff“.

Hefur stíllinn þinn breyst mikið í gegnum tíðina og hvernig þá?

Fatastílinn minn hefur tekið miklu breytingum síðan ég byrjaði að hafa áhuga á tísku. Snemma í grunnskóla hafnaði ég öllu sem þótti kvenlegt og gekk aðeins í mjög karlægum fötum. Ég hélt að karllægu fötin myndu veita mér meira vald í þessu samfélagi en í dag finnst mér kvenlegur fatnaður ekki síður valdeflandi. 

Á miðstigi tók ég U-beygju og þegar ég hafði hugrekki til klæddist ég í gamaldags kjólum sem líktust þeim sem þjónustustúlkunnar í Jane Austen-myndunum klæddust. Kvikmyndin Amélie hafði síðan gríðarleg áhrif á mig og aðalleikkonan varð að minni tískufyrirmynd. 

Ég hélt svo áfram að sækja innblástur til Frakklands og í Kvennó voru pelsarnir aðalatriðið en þeim fylgdu oft rauð alpahúfa og varalitur.

Hvaðan sækirðu innblástur í tískunni?

Það er fyrst og fremst hugrekki annarra sem veitir mér innblástur en ég get alltaf horft á Beðmál í borginni (e. Sex and the City) ef mig vantar innblástur. 

Þar eru margar tískutilraunir gerðar sem flestar slá í gegn.

Ertu með einhver boð og bönn þegar það kemur að klæðaburði?

Nei en mér finnst hjarðhegðun hjá unglingum oft leiðinlegt en um leið skiljanleg.

Hver er eftirminnilegasta flík sem þú hefur klæðst og af hverju?

Það er án efa röndótta og litríka húfa mín sem ég lét ekki frá mér fyrstu árin í Austurbæjarskóla. Það lá við að ég tæki hana ekki niður í kennslustundum. 

Húfan varð eins konar einkennisklæðnaður minn og þau úr Austurbæjarskóla þekkja mig enn þá sem stelpuna með röndóttu húfuna.

Býrðu yfir einhverju góðu ráði þegar það kemur að tísku?

Svo að ég vitni í Sssól: „Vertu þú sjálfur, gerðu það sem þú vilt.“

Hér má fylgjast með Jónu Grétu á samfélagsmiðlinum Instagram.