Að undirbúa uppsögn og nýja vinnu

En stundum erum við með markmið um starfsframann og breytingar á honum. Höfum ef til vill gælt við það í ákveðinn tíma að fara að þreifa fyrir okkur um nýtt starf en ákváðum að leyfa sumrinu að ljúka og fara frekar af stað með haustinu.

Og þar sem haustið er handan við hornið, er ágætt að byrja á því að undirbúa okkur. Hér eru nokkur atriði sem upplagt er að nýta ágúst mánuð í.

Hvers vegna?

Þótt þú vitir nokkurn veginn hvers vegna þú ætlar að skipta um starf, er ágætt að skrifa allt niður þessu markmiði tengt.

Svara spurningunni: Hvers vegna? Og miða þá við að svörin séu nokkuð mörg því að þá eru meiri líkur á að við séum enn betri í að móta hugmyndir um það, hvaða væntingar við höfum þá til nýja starfsins.

Styrkleikar, ástríða

Það sem er líka gott að gera áður en vinna hefst við ferilskránna sjálfa, er að punkta niður hjá okkur hverjir eru okkar helstu styrkleikar og jafnvel ástríður í starfi. Með því að gera þetta, erum við líklegri til að koma þessum styrkleikum okkar betur á framfæri þegar að við byrjum að skrifa ferilskránna.

Stórir draumar og markmið

Í þessu þriðja skrefi ætlum við að leyfa okkur að dagdreyma svolítið því að stundum gera dagdraumar okkur verulegt gagn. Prófaðu því að skrifa niður nokkur atriði sem endurspegla stærstu draumana þína og markmið. Um hvers konar starf, hvaða laun og svo framvegis.

Hérna er um að gera að leyfa okkur að vera bara í flæði og sýna af okkur létt kæruleysi því að þetta eru aðeins punktar til að skerpa á okkar eigin hugsunum og enginn annar að fara að lesa þá. En með því að leyfa stærstu draumunum okkar að koma fram, hjálpum við okkur oft að taka skynsamlegri næstu skref.

Sem á endanum geta leitt til stóra draumsins.

Eftir eitt ár, fimm ár, tíu ár

Þá er ágætt að skrifa niður 2-3 setningar um starfið þitt og vinnuumhverfi eins og þú sérð það fyrir þér eftir eitt ár, fimm ár og tíu ár.

Skrifaðu alltaf niður hvernig þér líður í starfinu og vinnuumhverfinu. Það er mikilvægasta atriðið.

Tengslanetið

Síðan er ágætt að fara aðeins yfir tengslanetið þitt. Hverja ætlar þú að láta vita að þú sért að fara að þreifa fyrir þér með nýja vinnu? Eru það aðilar sem gætu nýst við atvinnuleitina eða sem meðmælendur?

Ætlar þú að leita af nýju starfi opinskátt eða í hljóði? Ef þú ert í starfi, er atvinnuleitin oft ekki opinber. En ef þú ert ekki í starfi, er um að gera að láta sem flesta vita að þú sért að leita þér að vinnu.

Annar undirbúningur

Þá er gott að fara yfir það hvaða aðstoð er líkleg til að gagnast þér þegar þú ferð í stellingar fyrir atvinnuleitina.

Hvern ætlar þú til dæmis að fá til að lesa yfir ferilskránna þína? Hvar getur þú fundið þér góða ferilskrá sem fyrirmynd?

Hér er líka mjög gott að fara aðeins yfir það í huganum hvað þú óttast mest og velta því þá fyrir þér hvernig þú getur sótt þér aðstoð til þess að yfirstíga þennan ótta. Dæmi: Þú hefur áhyggjur af því að yngra fólk eigi betri séns en þú á atvinnumarkaði eða þú hefur áhyggjur af því að starfsreynslan þín sé ekki nægilega mikil til að fá það starf sem þú þó vilt stefna að. Með þetta í huga skiptir ferilskráin og kynningabréfið enn meira máli og því um að gera að leita aðstoðar.

Hvað er síðan gott að vita áður en maður sækir um starf eða hvernig maður ber sig að í atvinnuviðtali? Hvar leitar þú að þessum upplýsingum og hvernig sérðu fyrir þér að æfa þig?

Þá er gott að punkta niður þá samfélagsmiðla sem þú ert á því liður í því að undirbúa starfsleit er að yfirfara upplýsingar um þig þar, þannig að þær líti vel út áður en formleg atvinnuleit hefst.