Skýringar á leti starfsfólks gætu verið stjórnunartengdar

Leti í vinnunni er hins vegar vandamál ef við upplifum hana viðvarandi. Hjá okkur sjálfum eða vinnufélaga.

Það áhugaverða er að oft er skýringin einhver allt önnur en leti þegar farið er að skoða málin. Jafnvel að helsta vandamálið sé stjórnunarlegt.

Við skulum rýna í sex atriði sem byggja á samantekt birtri í Forbes.

1. Tilfinningin um að standa sig ekki nógu vel

Það getur dregið úr afköstum okkar og vilja til vinnu ef okkur líður eins og við séum ekki að standa okkur nógu vel, að við séum langt frá því að vera jafn góð og samstarfsfólkið okkar eða hreinlega glímum við að vera fullkomnunarsinnar. Hér getur baráttan verið svolítið snúin því hún er okkur svo huglæg. Hvernig fáum við hugann okkar til að skilja að við séum að standa okkur vel eða að það sé ekkert sem heitir að gera eitthvað fullkomlega?

Gott fyrsta skref er þó að átta okkur á því að hugurinn er að reyna að sannfæra okkur um eitthvað sem á ekki við rök að styðjast.

Þá er meira um það í dag að stjórnendur horfi meira til styrkleika hvers og eins og reyni að úthluta verkefnum til starfsfólks í samræmi við þá. Mögulega mætti skoða þetta atriði líka.

2. Ónæg upplýsingamiðlun eða kennsla

Algengt vandamál á vinnustöðum um allan heim er að starfsfólk fær ekki nægilega góða kennslu eða leiðbeiningar við verkefni.

Þetta hefur líka komið í ljós á vinnustöðum sem telja sig þó vera með allt nýliðunarferli í góðu standi og svo framvegis.

Þegar við hræðumst verkefni, teljum okkur ekki kunna þau nógu vel eða vitum ekki alveg hvernig við eigum að byrja á þeim, eigum við það til að forða okkur undan þeim verkefnum. Sem sumir gætu misskilið sem leti.

3. Að rýna í skýringar á verkkvíða eða verkfælni

Stundum þyrmir svo yfir okkur að við nánast frjósum eða líðanin dregur úr okkur allan mátt. Orsakirnar á þessu gætu til dæmis verið of langur verkefnalisti, of mikil truflun í umhverfinu þannig að við náum ekki að einbeita okkur og fleira.

Að upplifa verkkvíða er líka þekkt tilfinning. Sem í flestum tilvikum sannast síðan að vera óþörf líðan því flest okkar getum miklu meira en við teljum okkur oft trú um.

Að endurskoða verkefnalistann okkar og þá sérstaklega forgangsröðun verkefna gæti því verið gott ráð. Eins að nýta þessi næðisrými sem eru víða í boði á vinnustöðum eða prófa að vinna verkefni með heyrnartólum. Ef við teljum okkur glíma við verkkvíða væri ráðlagt að ræða við einhvern aðila um það. Jafnvel heimilislækninn okkar.

4. Að finnast erfitt að biðja um aðstoð

Allt frá því að við erum börn í skóla getur það skref að biðja um aðstoð eða rétta upp hendi eftir aðstoð verið okkur erfitt skref. Sem hreinlega margir þora oft ekki að taka.

Það sem er gott að hafa í huga í þessu er að rannsóknir afa sýnt að fólk er miklu jákvæðara og reiðubúnari til að hjálpa okkur en við teljum sjálf. Við skulum því frekar líta á það sem jákvætt skref frekar en neikvætt því það að biðja um aðstoð er bara hið besta mál.

Hér er líka mælt með því að stjórnendur séu virkir í að tala fyrir því að við séum teymi sem erum alltaf reiðubúin til að hjálpa. Þannig að menningin og andrúmsloftið sé síður þannig að fólk þori ekki að biðja um hjálp.

5. Að vera sammála um að vera ósammála

Að upplifa sig latan í vinnunni getur skýrst af átakafælni eða óttanum við að segja að við séum ekki sammála því að hlutirnir séu gerðir á þennan háttinn eða hinn. Eins geta vandamál í samskiptum innan vinnustaða leitt til þess að fólk kýs að draga sig í hlé frá verkefnum.

Stundum þurfum við hins vegar að vera sammála um að vera ósammála og vinna okkur jákvætt áfram út frá því þannig að allir haldi virðingu sinni, öllum finnist að á þau sé hlustað og svo framvegis. Því þegar þetta er ekki til staðar, er algengt að fólk hreinlega langi ekki eins mikið til að taka þátt í verkefnum eða vinnu.

6. Andleg heilsa, jákvæðni og gleði á vinnustaðnum

Loks er það andrúmsloftið á vinnustaðnum, vinnustaðamenningin, gleðin, jákvæðnin, traustið. Þegar okkur líður vel á vinnustað eru samskipti að öllu jafna góð, við erum óhræddari við að biðja um aðstoð, starfsánægja er meiri því okkur finnst gaman í vinnunni og svo framvegis.

Þegar fólk upplifir sig vera viðvarandi latt í vinnunni en finnst það ólíkt sjálfu sér, eða upplifir leti sem viðvarandi hjá samstarfsfólki, getur það verið vísbending um að vinnustaðurinn þurfi að leggja meiri áherslu á andlega heilsu starfsfólks og jákvætt andrúmsloft.

Þrjú atriði eru nefnd sérstaklega sem einkenni vinnustaðar þar sem efla þarf jákvætt andrúmsloft en þessi þrjú atriði eru:

1. Samkeppni á milli starfsfólks er ekki heilbrigð samkeppni, heldur leiðir jafnvel til þess að sumt starfsfólk dregur sig í hlé
2. Sumt starfsfólk upplifir sem ekki sem hluta af teyminu
3. Starfsfólk fær ekki að vinnan vinnuna sína sjálfstætt og án of mikilla afskipta. Sem oftar en ekki leiðir til þess að fólki finnst því ekki vera treyst.