Alltaf haft þörf til að vera sýnileg og litrík

Tískutal er fastur liður á Vísi þar sem rætt er við ólíka einstaklinga um þeirra persónulega stíl og hvernig tíska nýtist þeim í daglegu lífi. Klæðaburður er sannarlega fjölbreytt listform en við fáum að skyggnast inn í ólíka fataskápa og fræðast nánar um það merkilega tjáningarform sem tíska er fyrir hverjum og einum viðmælanda.

Hvað finnst þér skemmtilegast við tískuna?

Mér finnst tíska og persónulegur stíll hvers og eins svo skemmtilegt tjáningarform. Hún segir svo mikið um manneskjuna og gerir manni kleift að tjá sig í gegnum flíkurnar.

Svo eru öll þessi trend svo áhugaverð og tískan ávallt síbreytileg.

Hver er uppáhalds flíkin þín og af hverju?

Ég á það til að kalla mig páfugl því ég elska litríkar statement flíkur. Yfirhafnir eru í miklu uppáhaldi og ég er komin með ágætis safn af alls kyns kápum og jökkum. Ég keypti eina Y2Kvintage kápu af Depop fyrir tveimur árum sem stendur upp úr. Hún er úr gallaefni, flauel með loði. Algjör one of a kind flík.

Eyðirðu miklum tíma í að velja föt hverju sinni?

Dagsdaglega þá á ég það til að vera nokkuð þægileg í klæðaburði. Outfittið þessa dagana er oftast í kósý galli, bomber jakki, sorel bomsur og húfa. Alveg smá redneck fílingur og algjör andstæða við uppáklæddu Kollu. 

Þegar ég er að fara eitthvað fínna pæli ég alveg svolítið í lúkkinu og finnst gaman að vera í einhverju maximalísku dressi með geggjað makeup.

Hvernig myndirðu lýsa stílnum þínum?

Stíllinn minn er mix af 60's, 70’s og 90’s tímabilunum með smá diskó dívu tvisti.

Ég hef alltaf tengt mikið við 60's tímabilið. Ekki einungis hvað tísku varðar, heimilið mitt er að mestu í þeim anda og ég elska tónlistina frá þessum tíma.

Hefur stíllinn þinn breyst mikið í gegnum tíðina og hvernig þá?

Já, alveg helling. Ég hef tekið alls kyns tímabil og þau verið misgóð.

Ég hef þó alltaf haft einhverja þörf fyrir að vera sýnileg og litrík þegar kemur að tísku og er alls ekki hrædd við að prófa mig áfram og ögra aðeins norminu.

Hvaðan sækirðu innblástur í tískunni?

Mikið af mínum innblæstri kemur frá kvikmyndum og tónlist. Svo eru nokkrar legendary dívur sem ég lít upp til og þar má nefna Sharon Tate, Grace Jones, Cher og fleiri. Ég elska drag og þar horfi ég mikið upp til David Bowie. Ég fæ líka hellings innblástur frá þáttunum RuPaul’s Drag Race og þá sérstaklega þegar kemur að förðun.

Ertu með einhver boð og bönn þegar það kemur að klæðaburði?

Nei, ég get ekki sagt það. Öllum á bara að líða vel og vera í því sem þeim finnst flott. Ég er mjög opin og í frekar miklu flæði almennt. 

Ég gleypi þó alls ekki við öllum trendum og reyni að vera samkvæm sjálfri mér.

Hver er eftirminnilegasta flík sem þú hefur klæðst og af hverju?

Ég ætla fá að velja tvær.

Fyrst er það hlébarðasamfestingurinn minn. Hann er ekkert merkilegur þannig, nema fyrir þær sakir að vera svolítið mikið extra! 

Ég nota hann alls ekki oft en fyrir sérstök tilefni þar sem ég vil vera yfirgengilega mikil pæja líkt og á afmælinu mínu.

Svo númer tvö er ein þyngsta peysa heims sem ég puttaprjónaði sjálf. Fyrsta flíkin sem ég prjóna og afar stolt af henni en hjálpi mér, það er ekkert grín að athafna sig í henni. 

Skulum segja að það sé skemmtilegra að horfa á hana en að klæðast henni.

Býrðu yfir einhverju góðu ráði þegar það kemur að tísku?

Veldu þér stíl og flíkur sem láta þér líða vel. Ekki alltaf bara kaupa það sem er í tísku eða öðrum finnst flott. Það skína allir skært ef þeim líður vel með það sem þau klæðast.

Second hand er æði og fullt af fallegum fjársjóðum sem leynast þar, sem er gott fyrir umhverfið. Svo bara fylgja innsæinu og vertu þú sjálf/sjálft/sjálfur.

Hér má finna Instagram síðu Kolbrúnar Önnu.