Höfða mál gegn Twitter vegna vangoldinnar leigu

Það samsvarar rúmum nítján milljónum króna. Umrætt húsnæði sem Twitter er sagt skulda leigu fyrir er ekki í höfuðstöðvum fyrirtækisins í San Francisco heldur annarsstaðar í borginni.

Wall Street Journal segir að fram komi í lögsókninni að forsvarsmönnum Twitter hafi verið gert ljóst um miðjan desember að fyrirtækið skuldaði leigu. Um það leyti bárust fyrst fregnir af því að Twitter hefði hætt að greiða leigu af skrifstofuhúsnæði fyrirtækisins víðsvegar um heiminn og að verið væri að skoða að borga ekki uppsagnarfrest fyrrverandi starfsmanna.

Allt ku þetta vera liður Elons Musk, nýs eigenda Twitter, í að draga úr kostnaði hjá fyrirtækinu sem hann keypti fyrir 44 milljarða dala á síðasta ári.

Forsvarsmenn annarra fyrirtækja, eins og flutningafyrirtækis og hugbúnaðarfyrirtækis, hafa einnig höfðað mál gegn Twitter á undanförnum vikum, samkvæmt frétt WSJ.

Twitter hefur ekki skilað hagnaði frá árinu 2019. Musk skrifaði snemma á árinu undir samning um að kaupa fyrirtækið á 44 milljarða en varði svo næstu mánuðum í að reyna að komast undan því. Hann samþykkti þó á endanum að kaupa fyrirtækið og tók það af hlutabréfamarkaði.

Við það stigmögnuðust skuldir Twitter og er útlit fyrir að fyrirtækið muni þurfa að greiða rúman milljarð dala í vaxtagreiðslur á þessu ári. Árið 2021 greiddi Twitter um 51 milljón í vaxtagreiðslur.

Sjá einnig: Skuldir Twitter stigmagnast við yfirtöku Musks

Með því fyrsta sem Musk gerði var að segja upp stórum hluta starfsmanna Twitter, eða um þremur af hverjum fjórum, og hleypa umdeildu fólki sem hafði verið bannað á samfélagsmiðlinum aftur þar inn. Þar á meðal eru alræmdir rasistar og öfgamenn.

Aukin óreiða á Twitter hefur leitt til þess að flestir af stærstu auglýsendum þar eru hættir að auglýsa og því hefur Musk lagt mikið púður í að auka tekjur fyrirtækisins. Meðal annars hefur Twitter boðið upp á áskriftarþjónustu fyrir notendur.

Fregnir hafa borist af því að erfiðlega hafi gengið að laða áskrifendur aftur að samfélagsmiðlinum. WSJ sagði frá því í desember að meðal annars væri verið að skoða leiðir til að tryggja að auglýsingar birtist ekki nærri tístum sem þykja hneykslanleg eða sem auglýsendur vilja ekki láta bendla vörumerki sín við.

Líkti Twitter við væntanlegt flugslys

Musk sjálfur lýsti Twitter nýverið sem flugvél sem stefndi hraðbyr á jörðina, með logandi hreyfla og ónýt stjórntæki. Spár sýndu fram á að mögulega gæti orðið þriggja milljarða dala halli á rekstri Twitter á þessu ári.

Þess vegna sagðist Musk hafa varið undanförnum vikum í niðurskurð.

New York Times sagði frá því fyrir áramót að Musk hefði skipað starfsfólki sínu að borga ekki fjölmarga reikninga fyrirtækisins og annað hvort semja aftur um þá þjónustu sem reikningarnir snúa að eða hætta að kaupa hana alfarið.

Þar er innifalin öryggisgæsla og hreinsunarþjónusta og sagði miðillinn frá því að einhverjir starfsmenn hefðu þurft að taka klósettpappír með sér í vinnuna. NYT segir óreiðu ríkja á skrifstofu Twitter í San Francisco þar sem rusl sé byrjað að safnast upp og salerni séu skítug.

Fyrirtækið hefur einnig hætt að greiða leigu fyrir skrifstofuhúsnæði í Seattle í Bandaríkjunum og standa starfsmenn Twitter þar frammi fyrir því að vera vísað á dyr. Þá lét Musk loka einu af þremur gagnaverum Twitter.