Bjó til skauta­svell í garðinum

Ólöf Dagný bauð Elísabetu Ingu Sigurðardóttur, fréttamanni Stöðvar 2, í skötuveislu fyrr í kvöld. Hún segir hefðina árlega - það sé engin Þorláksmessa án hinnar kæstu skötu.

„Þetta er búið að vera alveg síðan ég var lítil, mamma bauð alltaf öllum heim. Og síðan þegar hún var orðin níutíu ára þá treysti hún sér ekki lengur þannig að ég tók við,“ segir Ólöf Dagný.

Hún eldar skötuna úti og segir að þeim, sem ekki þyki skatan góð, sé boðið upp á pizzur. Sjálfri þyki henni skatan æðisleg.

Minnsta vesenið að elda úti

„Það eru svona alltaf einhverjir sem eru að kvarta en þetta er minnsta vesenið; að elda þetta úti. Svo þarf maður að hreinsa allt og lofta út og þá er maður góður fyrir veisluna á morgun.“

Í tilefni jólanna ákvað Ólöf Dagný að búa til skautasvell í garðinum heima. Aðspurð situr hún ekki á svörum:

„Ég er mikil stemningsmanneskja. Ég ákvað bara að skella í þetta, þegar ég heyrði að það yrði frost fram yfir áramót - að hafa skautasvell. Og hafa þetta svona eins og „photo-booth“, þannig að nú er hægt að taka myndir af sér hér fyrir jólakortin – þó að seint sé,“ segir hún og hlær.

Svellið er engin smásmíði.

„Ég setti bara plast, smíðaði grind og fór svo með nokkrar fötur af vatni, því það er náttúrulega allt frosið í slöngunni, þannig ég hellti bara í þetta þangað til að þetta væri orðið nokkuð gott. En ég ákvað fyrir gestina að setja teppi svo að enginn myndi slasast hér í kvöld.“