Heitustu trendin: Crocs skór, fall­hlífar­buxur og bensín­stöðvarsól­gler­augu

Þær Sunneva og Birta halda úti hlaðvarpinu Teboðið. Í nýjum þætti fóru þær yfir heitustu trendin í tískuheiminum. Stelpurnar eru þekktar fyrir það að vera með puttann á púlsinum er viðkemur tísku og því er vert að taka saman það sem þær telja að verði inn á næstunni.

Of stórir blazer jakkar

„Okkar góði besti oversized blazer, hann er ekki farinn,“ segja stelpurnar. En slíkir jakkar hafa verið vinsælir í dágóðan tíma og virðist ekkert lát vera á þeim vinsældum.

Blazer jakka er að finna í flestum tískufataverslunum í hinum ýmsu sniðum og ættu því allir að geta fundið sér slíkan jakka við sitt hæfi.

Í dag þykir þó sérstaklega smart að vera í blazer jakka sem er nokkrum númerum of stór, eða jafnvel úr herradeildinni til þess að sniðið sé extra afslappað. Lykilatriðið er að jakkinn sé ekki of aðsniðinn.

Stelpurnar benda á að gera megi góð kaup á blazer jökkum á nytjamörkuðum eða í öðrum verslunum sem selja notaðan fatnað.

Stígvél

„Það er bara the hottest shit! Svona ýkt stígvél, kúrekastígvél og svoleiðis.“

Sjá einnig: Kúrekastígvél og cargo buxur það allra heitasta

Stígvél geta til dæmis verið einstaklega töff með blazer jakka. Þá er „afslappað“ enn og aftur lykilhugtak. Sunneva segir laus stígvél sem ná upp að hnjám vera inn, en níðþröng klofstígvél aftur á móti alls ekki vera málið.

„Ég vil ekki sjá það. Það má bara setja þetta aftur ofan í kassa og senda þetta til 2018!“

Crocs skór og klossar

Crocs skór hafa verið nokkuð áberandi í tískuheiminum undanfarin misseri. Sunneva er mikill aðdáandi og á hún þó nokkur pör. Hún segist nota þá við hin ýmsu tilefni; hún fer í þeim í ræktina, göngutúra og mætir jafnvel í þeim á fundi.

„Þeir eru náttúrlega coming in hot. Þeir eru ekki að fara neitt, annars fer ég með þeim.“

Þá spáir hún því einnig að gömlu góðu klossarnir eigi eftir að ryðja sér til rúms í tískuheiminum á næstunni.

„Þetta er bara eins og þetta var í gamla daga, nema núna er þetta orðið meira svona „fashionable“ með smá hæl og platformi.“

Látlausir bolir

Þegar kemur að bolum virðast einfaldleiki og gæði vera aðalmálið. Bæði ermalausir bolir og venjulegir hlýrabolir eru heitir um þessar mundir. Hægt er að leika sér að því að klæða þá bæði upp og niður fyrir hvaða tilefni sem er.

Birta bendir á að hvítir hlýrabolir hafi verið afar áberandi á nýlegum viðburði PRADA tískurisans.

„Þetta er klassík. Þetta er bara svona flík sem þú þarft að eiga í skápnum þínum, einn svartan, einn hvítan og kannski einn beige.“

Bensínstöðvasólgleraugu

Eins og áður segir er „áreynslulaust“ eitt af einkennisorðum tískunnar núna og þar eru sólgleraugun engin undantekning. Sunneva segir að svokölluð „bensínstöðvasólgleraugu“ séu það heitasta um þessar mundir. Þá er markmiðið að þú lítir út fyrir að hafa gripið sólgleraugun á næstu bensínstöð.

„Bara svona draslsólgleraugu. Ég gerði ekki annað þegar ég var úti á Spáni og Grikklandi í sumar að fara á alla svona markaði og finna ljót sólgleraugu. Það er hot.“

Þá hafa stjörnur á borð við Kim Kardashian, Rihanna og Hailey Bieber einnig sést skarta slíkum sólgleraugum, þó svo þau hafi vissulega alls ekki verið keypt á bensínstöð.

Tískurisar á borð við Balenciaga, Gucci, Givenchy og Celine eru nefnilega farnir að framleiða sólgleraugu með þessu eftirsótta ódýra lúkki, þó svo verðið sé síður en svo ódýrt.

Mjóir treflar og bindi

„Það er eitt sem mig langar í og það eru svona ógeðslega mjóir treflar,“ segir Sunneva.

Slíkir treflar eru vissulega ekki hannaðir fyrir íslenskt veðurfar, heldur einungis hugsaðir fyrir lúkkið. Þá spá þær því að mjó bindi muni jafnvel komast í tísku á næstunni.

Íslendingar geta þó andað léttar, því stelpurnar segja að stórir, hlýir treflar verði áfram í tísku.

Legghlífar og ballerínuskór

Annað trend sem myndi koma sér einstaklega vel í íslenskri veðráttu eru legghlífar. Sunneva spáði því fyrr á árinu að gömlu góðu legghlífarnar væru að fara vera með endurkomu. Það hefur ekki ennþá gerst en hún segist ennþá standa við þau orð.

Sjá: Legg­hlífar og litaðar strípur gætu orðið næstu trend

Nokkrar tískudrottningar sáust klæðast legghlífum á tískuvikunni í París fyrir skömmu og því aldrei að vita nema spá Sunnevu reynist rétt.

Legghlífarnar eru þá gjarnan notaðar við svokallaða ballerínuskó sem Sunneva spáir einnig að muni eiga sterka innkomu á næstunni, þrátt fyrir að hún hafi sjálf sterkar skoðanir á slíkum skóm.

„Ég kvíði fyrir því að sjá fólk í þessu. Þetta er það ljótasta sem ég hef séð á ævinni og þetta er að koma aftur,“

segir hún og bætir því við að slíkir skór ættu aðeins að sjást á ballerínum eða litlum börnum, að hennar mati.

Mokkasíur og háir sokkar

Í haust hefur borið mikið á svokölluðum „loafers“ eða mokkasíum. Þær getur verið sérstaklega flott að para saman með uppháum sokkum, samsetning sem minnir á skólabúning.

„Hailey Bieber var með alveg geggjað lúkk. Hún var í loafers, háum sokkum og skyrtu við.“

Rykfrakkar og bomber jakkar

Annað sem stelpurnar nefna eru rykfrakkar (e. trenchcoats) sem virðast aldrei detta úr tísku.

„Það passar við allt. Alltaf flott. Alltaf skemmtilegt.“

Þá nefna þær einnig að svokallaðir bomber jakkar muni eiga sterka endurkomu á næstunni.

Vesti og fallhlífabuxur

Vesti verða einnig heit á næstunni og þá er sama hvort um er að ræða dúnvesti, hekluð vesti, blazer vesti eða gallavesti.

„Þetta gefur svona smá strúktúr á skyrturnar þínar. Ég elska að setja korsett eða vesti yfir skyrtu, það gefur rosa flott lúkk.“

Þá hafa svokallaðar fallhlífabuxur (e. parachute pants) verið áberandi undanfarin misseri. Um er að ræða afar víðar buxur úr efni sem líkist fallhlíf og eru buxurnar ekki ósvipaðar vindbuxum.

„Að vera í parachute pants og vindjakka, með sleiktan snúð og sólgleraugu. Það er svona mitt fullkomna lúkk akkúrat núna,“ segir Sunneva.

„Svona eins og þú hafir ekki hugsað neitt út í þetta“

Sunneva og Birta eru sammála um það að tískan í dag líti út fyrir að vera afslöppuð og áreynslulaus, þó svo að oftast búi að baki mikil fyrirhöfn og miklar pælingar.

„Svona eins og þú hafir bara hoppað í of stóran blazer af kærastanum þínum og hafir ekki nennt að þrífa á þér hárið, þannig þú settir það bara í sleikan snúð. Þetta er svona eins og þú hafir ekki hugsað neitt út í þetta, þegar þú í raun hugsaðir alveg út í þetta.“

Hér að neðan má hlusta á Teboðið í heild sinni.