Tíu algengustu vandamálin á vinnustöðum

Sérfræðingar hjá The International Psychology Clinic hafa tekið saman tíu algengustu vandamálin sem starfsfólk glímir við á vinnustöðum en flest þeirra er í höndum stjórnenda vinnustaða að leysa.

Þessi tíu atriða listi er eftirfarandi og nú er um að gera að hver og einn velti fyrir sér hvort eitthvert þessara atriða mætti bæta úr á þeirra vinnustað. Því vandamál eru til þess að leysa þau!

1. Starfsfólk fær ekki nægilega þjálfun eða aðstoð í upphafi

Of algengt er að nýliðum sé nánast kastað í laugina þegar fólk byrjar í nýju starfi eða að þjálfunin sem fólk fær er ómarkviss og ekki nægilega góð.

Leið til að bæta úr þessu er að hafa starfslýsinguna við hendina og tryggja að þjálfun starfsmannsins sé í samræmi við það sem stjórnandinn ætlast til að fá frá viðkomandi. Hér er sérstaklega bent á að huga vel að verklegri þjálfun.

2. Stjórnendur vanda sig ekki við hlustun

Það telst samskiptavandi hjá stjórnendum ef stjórnandinn áttar sig ekki nægilega vel á því hlutverki sínu að hann/hún þarf að hlusta á starfsfólkið sitt. Eitt af algengustu vandamálum vinnustaða er að stjórnendur gefa fyrirmæli og tala sjálfir, en hlusta ekki á hvað starfsfólkið hefur fram að færa.

Leið til lausna er virk hlustun leiðtoga.

3. Latir samstarfsmenn 

Ef það er einhver innan starfshópsins sem kemst upp með að vera latur í vinnunni, er ekki ólíklegt að þessi leti smiti út frá sér. Áhrifin geta endurspeglast í því að aðrir taka upp sömu starfshætti og standa sig ekki eins vel og annars væri, eða að latir starfsmenn fara í taugarnar á þeim sem eru að standa sig vel.

Góðir stjórnendur eiga að horfa á frammistöðu allra starfsmanna sem áskorun og það á ekkert síður við um þá sem ekki eru að standa sig nægilega vel. Mögulega þarf að aðstoða þá starfsmenn sérstaklega eða þjálfa, þannig að styrkleikar þeirra og hæfni njóti sín betur í starfinu.

4. Vinnuaðstaða fólks er ekki nógu góð

Það er staðreynd að ef vinnuaðastaða starfsfólks er ekki nógu góð eða jafnvel óviðunandi, bitnar það helst á þeim árangri eða ávinningi sem vinnuveitendur gætu annars fengið frá starfsmönnum. Afleiðingar geta birst með ólíkum hætti, allt frá því að kulnun er of algeng og viðvarandi streituástand starfsmanna yfir í að fólk hreinlega missir áhugann á að standa sig eins vel og það gæti.

Stjórnendum er bent á að í þessum efnum uppsker vinnustaðurinn því sem hann sáir.

5. Stjórnendur ekki nógu duglegir að hrósa

Þegar fólk leggur sig í líma við að standa sig vel í vinnu en lærir fljótt að það mun hvorki hljóta hrós, jákvæða endurgjöf eða jafnvel viðurkenningu fyrir, er hætta á að áhuginn á því að standa sig svona vel dvíni.

Það fylgir mannlegu eðli að við viljum vera metin af verðleikum og hér er því beint til stjórnenda að það er hluti þeirra starfs að gefa jákvæðan innblástur og drifkraft inn í hópinn.

6. Starfslýsingin og starfið passa ekki saman

Óskýr starfslýsing, engin starfslýsing eða starfslýsing sem passar ekki við starfið er mun algengari vandamál á vinnustöðum en fólk kannski heldur. Hvernig er staðan á þessu á þínum vinnustað?

Stjórnendum er bent á að því skýrari sem starfslýsingin er, því betra fyrir alla aðila. Starfsmaðurinn veit betur til hvers er ætlast og það er á ábyrgð stjórnandans að þetta liggi fyrir áður en gengið er frá ráðningu.

7. Reglur og stefnur fínar á pappír en…

Síðustu árin hefur það færst í vöxt að vinnustaðir eru að setja sér alls kyns reglur, viðmið, áherslur og stefnur um hina og þessa hluti sem snúa að starfseminni eða starfsfólki. 

Of oft eru þetta skrifaður texti sem lítur vel út á pappír en er meira á orði en á borði. 

Þetta þýðir að upplifun starfsfólks verður sú að öll þessi fínu boð og bönn, verklag og ferlar eru marklaus og enda með að verða letjandi frekar en hvetjandi.

Stjórnendum er bent á að í þessum efnum er allt gott í hófi og frekar að vera með færri reglur, boð eða bönn en skýrar og eitthvað sem allir þekkja og fara eftir.

8. Vankunnátta stjórnenda í breytingastjórnun

Breytingar eru órjúfanlegur hluti af vinnustöðum og þróun þeirra. En of algengt er að kunnáttan til að fylgja breytingum eftir vel sé ábótavant og ekki í samræmi við þarfir starfsfólks. 

Stjórnendum er bent á að gefa sér tíma í breytingar og/eða undirbúning þeirra. Og hér er minnt á að því upplýstara sem starfsfólk telur sig vera, því ánægðari er fólk í vinnu.

9. Lausnir á erfiðum málum með viðskiptavinum

Vinnustaðir þurfa að gera ráð fyrir að vandamál kunni að koma upp tengt viðskiptavinum. Sem stundum er erfitt að leysa úr en þar skiptir góð samskiptahæfni máli en einnig þjálfun.

Stjórnendur geta ekki ætlast til þess að starfsmenn þeirra verði meistarar í að ráða úr vandamálum með viðskiptavinum, nema þeir fái til þess þjálfun og leiðbeiningar.

10. Lítt sýnileg tækifæri til starfsþróunar

Okkur finnst það flestum spennandi tilhugsun að sjá fyrir okkur tækifæri til að vaxa í starfi. Þetta þarf ekkert endilega að þýða breyting á starfi eða stöðuheiti, heldur einnig tækifæri til að takast á við nýjar áskoranir í núverandi starfi.

Þá eykur það á starfsánægju fólks ef það hefur svigrúm til sköpunar og sjálfstæðis.

Eitt lykilhlutverk stjórnenda er að skapa þær aðstæður hjá starfsfólki að það sjái alltaf tækifæri til þess að þróa sig áfram eða vera hluti af því að skapa eitthvað nýtt, breyta eða betrumbæta.