​​„Eitt besta popplag sem ég hef fengið að vinna við síðustu þrjátíu árin“

Kosningar fyrir Hlustendaverðlaunin 2022 eru komnar vel af stað en hátíðin fer fram laugardaginn 19. mars næstkomandi. Útvarpsstöðvarnar FM957, Bylgjan og X 977 standa saman að þessari verðlaunahátíð og í flokknum Lag Ársins koma sjö lög til greina. Lífið á Vísi setti sig í samband við tónlistarfólkið á bak við þessa hittara og fékk að heyra söguna á bak við lagið.

Næsta lag sem við kynnum til leiks er dúettinn Spurningar með rapparanum Birni og söngvaranum Páli Óskari en blaðamaður fékk þá til að svara nokkrum spurningum.

Hvernig kviknaði hugmyndin að laginu og hvaðan kom innblásturinn?

Birnir: Ég skrifaði textann í útlöndum, man að ég hafði það smá erfitt á þeim tíma og svo gleymdi ég þessu bara. Ég var svo í stúdíóinu með Þormóði einn daginn og hann sýndi mér demo af taktinum, þá kom bara melódían og textinn aftur til mín. Hugmyndin kviknaði á staðnum og um leið og demoið var til sendi ég á Palla hvort hann vildi vera með. 

Þetta var ekkert sérstaklega úthugsað en ég fann á mér að þetta gæti orðið eitthvað nice.

Hvernig gekk ferlið og hvernig varð lagið að veruleika?

Birnir: Mig minnir að Palli hafi komið í stúdíóið daginn eftir að ég sendi á hann og við tókum session langt fram á nótt. Ég held að við höfum tekið tvö stúdíó session saman þar sem við tókum allt upp og svo hvíldum við lagið aðeins. Nokkrum vikum/mánuðum seinna settum við lagið upp og úr því kom lagið eins og það er núna. Þetta gekk allt ótrúlega vel og mér fannst frábært að fá að vinna með Palla.

Páll Óskar: Lagið var langt komið í vinnslu þegar Birnir einfaldlega hafði samband við mig og sendi á mig demó. Ég þykist þekkja góð popplög þegar ég heyri þau og ég heyrði strax að þetta gæti orðið hittari. Laglínan er svo rótsterk og grípandi, og slíkt heyrir maður ekki á hverjum degi. 

Textinn sló mig líka utanundir strax, sérstaklega línan ​​„Ég væri til í að elska þig, en þú veist þetta er ekki það.“ 

Ég stökk í stúdíóið hjá Birni og Þormóði pródúsent og úr varð þessi líka hrikalega fallegi dúett.

Áttuð þið von á því að lagið myndi ná svona vel til hlustenda?

Birnir: Maður veit það aldrei, en ég vissi samt alveg að þetta myndi verða eitthvað. Þegar við gerðum myndbandið við lagið þá fór þetta full circle og varð að þessari epík. Ég er bara mjög ánægður að fólk hafi hlustaðnsvona mikið því mér finnst þetta snilld. Það er gaman að þeim finnist það líka.

Páll Óskar: Um leið og við byrjuðum að hljóðblanda lagið þá fann ég á mér hvað við værum með stórt lag í höndunum. Við lögðum mikla vinnu í lokafráganginn á laginu og myndbandinu í kjölfarið af því við treystum því að þetta yrði stórt dæmi.

Þetta er eitt besta popplag sem ég hef fengið að vinna við síðustu 30 árin.

Kosning fyrir Hlustendaverðlaunin er nú í fullum gangi og geta hlustendur kosið það sem þeim þótti standa upp úr hér.