Gen.G seinasta liðið til að tryggja sæti sitt í undanúrslitum

Fyrsti leikur liðanna var í rauninni sá eini sem bauð upp á einhverskonar spennu. Gen.G tók nokkuð sannfærandi forystu snemma leiks, en eftir tæpar 25 mínútur náðu liðsmenn Cloud9 að sná leiknum sér í hag.

Cloud9 hélt forystunni um hríð, en Gen.G vann sig hægt og bítandi aftur inn í leikinn. Þegar tæpar 35 mínútur voru liðnar af leiknum voru liðsmenn Gen.G aftur komnir með forystuna, og í þetta skipti létu þeir hana ekki af hendi. Eftir 42 mínútur af Leagur of Legends var staðan orðin 1-0, Gen.G í vil.

Eftir jafnan og spennandi fyrsta leik vonuðust hlutlausir aðdáendur að svona yrðu næstu leikir einnig. Þeim varð þó ekki að ósk sinni því Gen.G átti ekki í miklum vandræðum með næstu tvo leiki.

Þeir tóku forystuna snemma í öðrum leik liðanna og eftir aðeins 25 mínútna leik var staðan orðin 2-0.

Liðsmenn Cloud9 bitu ögn meira frá sér í þriðju viðureign liðanna, enda allt undir fyrir bandaríska liðið í þeim leik. Þeir náðu ágætis forystu snemma leiks og héldu henni lengi vel. Eftir tæplega 28 mínútna leik tóku liðsmenn Gen.g hins vegar sinn fjórða dreka, og þar með drekasál, og leikurinn fór að snúast þeim í hag við það. Sex mínútum síðar var sigurinn þeirra, og sæti í undanúrslitum tryggt.

Gen.G mætir Edward Gaming í undanúrslitum næstkomandi sunnudag, en fyrri undanúrslitaviðureignin á milli ríkjandi heimsmeistara í DWG KIA og sigursælasta liðs sögunnar, T1, fer fram á laugardaginn kemur.

Hægt verður að fylgjast með undanúrlsitunum í beinni útsendnignu á Stöð 2 eSport og hefjast útsendingar klukkan 12:00 báða dagana.