Fylgja þarf fyrirmælum framleiðenda um tjónaviðgerðir í hvívetna

Undanfarna daga hefur verið fjallað nokkuð um tjón á nýlegum Nissan Leaf eftir umferðaróhapp árið 2019 sem olli skemmdum á rafhlöðu bílsins. BL hefur fylgst með málinu frá því að haft var samband við fyrirtækið vegna skyndilegra skertra afkasta rafhlöðu bílsins. BL hefur nú sent frá sér yfirlýsingu vegna málsins.

Yfirlýsing BL

Skoðun sérfræðinga BL á bílnum leiddi í ljós að gildi fyrir ákveðnar sellur í rafhlöðunni voru ekki í lagi en í samráði við eiganda var ekki farið í dýpri greiningu á þeim tíma. Það skal þó tekið fram að ekki þarf í öllum tilvikum að skipta út rafhlöðu í tjónum sem þessum, en skoða þarf hvert og eitt tilvik fyrir sig til að meta raunverulegt ástand og það hvort borgi sig fjárhagslega að gera við bílinn með fullnægjandi hætti.

Í ábyrgðarskilmálum framleiðenda, í þessu tilfelli Nissan, kemur m.a. fram að hann tekur ekki ábyrgð á gæðum eða endingu rafhlöðu rafbíls sem fengið hefur á sig það þungt högg að loftpúðakerfi bifreiðar virkjast sem mögulega gæti valdið tjóni á rafhlöðunni til lengri eða skemmri tíma. Svo var raunin í umræddu tilviki. Þessi afstaða er fyrst og fremst öryggisatriði í þágu ökumanns og farþega. Í tilfellum sem þessum gerir framleiðandinn kröfu um útskipti á sellum eða rafhlöðunni í heild sem á þá að vera hluti af tjónaviðgerðinni.

Þá vill BL einnig árétta mikilvægi þess að fyrirmælum framleiðenda rafbíla sé fylgt í hvívetna þegar kemur að þeim nauðsynlegu verkferlum sem fylgja þarf í tjónaviðgerðum. BL ehf. selur fjölda mismunandi gerða umhverfismildra fólksbíla frá framleiðendum sem fyrirtækið hefur umboð fyrir hér á landi. Hér er um að ræða BMW, Hyundai, Mini, Jaguar Land Rover, Nissan, Renault, MG og Subaru sem eru ýmist hreinir rafbílar, tvinnbílar (Hybrid eða Mild hybrid) eða tengiltvinnbílar (PHEV). Allir eiga bílarnir það sameiginlegt að vera búnir háspenntri rafhlöðu sem veitir afli til rafmótors. Rafhlöður rafbíla eru staðsettar í lokuðum einingum í undirvagni bílsins og enginn ætti að reyna viðgerð á rafbíl sem ekki hefur til þess vottaða fagþekkingu, þar sem þarf að fylgja nákvæmum leiðbeiningum sem snerta rafhlöðu bílanna, bæði er varðar réttingu og ekki síður málun þar sem rangt hitastig við bökun getur nálgast eða farið yfir suðumark í rafleiðnivökva rafhlaðanna og valdið tjóni á þeim.

Of auðvelt að fá umtalsvert tjónaða bíla endurskráða

Tjónasérfræðingar BL hafa um all langt skeið haft verulegar áhyggjur af því hversu auðvelt það er að fá umtalsvert tjónaða bíla (skráðir Tjónabifreið 2) endurskráða í umferðina. Úttekt og eftirlit með því ferli er lögum samkvæmt á ábyrgð Samgöngustofu. Að mati BL eru mjög alvarlegar brotalamir á slíkum úttektum á tjónabílum sem stofnað getur vegfarendum í mikla hættu. Á þessu verkferli þarf að gera mikla bragarbót, ekki aðeins hvað rafbíla varðar heldur einnig og ekki síður hvað varðar bíla sem smíðaðir eru úr áli og/eða koltrefjum. Tjónaviðgerðir slíkra bíla krefjast einnig allt annarra vinnubragða, verkfæra og fagþekkingar heldur en viðgerðir bíla úr stáli svo halda megi upprunalegu öryggi þeirra að lokinni viðgerð. Því miður eru þess nokkur dæmi að inn á gólf hjá BL hafi komið bílar með verulega skert burðarvirki eftir ófullnægjandi eða ranga viðgerð.



Leitað hefur verið eftir upplýsingum frá Samgöngustofu um verkferla við endurskráningar tjónabifreiða í flokki 2.