Fullorðinssýning með blautum húmor, beru holdi og fullt af töfrabrögðum

Á tímum samkomubanns hefur sviðslistafólk fundið sig knúið til að leita nýrra leiða til að halda sýningar og skemmtanir. Nokkuð hefur borið á því að tónlistarviðburðum hafi verið streymt eða tónlistarþættir sýndir í sjónvarpi. 

Sýningin Couch Cabaret er rafræn sviðslistasýning sem hægt er að kaupa sér aðgang að á netinu. Óhætt er að segja að þessi tiltekna sýning sé nokkuð óhefðbundin.

„Við köllum okkur Túttífrútturnar og höfum verið að sýna saman í eitt og hálft ár. Við erum íslenskur Burlesque hópur og höfum verið að halda reglulegar sýningar einu sinni í mánuði. En auðvitað stoppaði það allt þegar heimsfaraldurinn skall á og höfum við einungis náð að halda eina sýningu í sumar,“ segir sviðslistakonan C. Rouge í viðtali við Makamál. 

Sýningarnar hafa yfirleitt verið haldnar á skemmtistaðnum Gauknum og tvisvar sinnum í kjallara Hard Rock Café.

Fullorðinssýning sem er bönnuð innan 18 ára

Sýninguna Couch Cabaret segir C. Rouge vera algjöra fullorðinssýningu og því ekki ætluð börnum yngri en 18 ára. 

Þetta er sýning þar sem erótík og húmor mætast. Við erum þrjár úr Túttífrúttunum og fáum svo til liðs við okkur þekkt innlent og erlent sviðslistafólk. Sem dæmi þá verður töframaðurinn Lalli með okkur þannig að fólk má búast við blautum húmor, beru holdi og fullt af töfrabrögðum.

C.Rouge segir sviðslistafólk og aðra listamenn þurfa að hugsa út fyrir kassann þessa dagana og þess vegna hafi þær ákveðið að reyna að finna lausn til þess að geta sýnt fyrir fólk með tilliti til sóttvarna. 

„Camen Dea Untamed kom með þá hugmynd að setja upp rafræna sýningu þar sem þátttakendur og áhorfendur þyrftu ekki að vera í návígi. Ég og Silver Foxy stukkum á vagninn með henni og úr varð sýningin Couch Cabaret sem sýnd verður í kvöld.“

Hvar getur fólk nálgast sýninguna?

„Þetta er í raun mjög einfalt og þú þarft ekki að hlaða niður einhverju ákeðnu forriti til að horfa á sýninguna. Þú einfaldlega kaupir þér miða rafrænt, á Tix.is, og svo færðu senda vefslóð. Svo sestu bara í sófann heima hjá þér og horfir á fyrstu íslensku fullorðinssýninguna á netinu.“