Rótgróin fyrirtæki geta innleitt nýsköpun með viðhorfsbreytingu

„Innleiðing nýsköpunarstefnu kallar á viðhorfsbreytingu og krefst þess að nýsköpun sé fundinn farvegur þvert á svið fyrirtækisins. Viðskiptavinurinn, hvort sem um ræðir einstaklinga eða fyrirtæki, er settur í forgrunninn,“ segir Salóme Guðmundsdóttir framkvæmdastjóri Icelandic Startups aðspurð um í hverju innleiðing nýsköpunarstefnu í fyrirtæki felst helst. „Allt snýst um að bæta þjónustuna, gera upplifun okkar sem neytenda sem besta, einfaldasta og þægilegasta,“ segir Salóme.

Í dag mun Atvinnulífið fjalla um það í þremur greinum hvernig atvinnulífið getur mætt óvissutímum framundan með innleiðingu nýsköpunarstefnu og frumkvöðlahugsunar. Sérstaklega er horft til þess hvernig hið opinbera gekk í verkefnið og hvernig stór sem smá, rótgróin sem ný, fyrirtæki geta gert hið sama. Í fyrramálið verður  til viðbótar fjallað um hvernig stjórnir rótgrónna félaga geta innleitt nýsköpun meira inn í sitt starf.

Salóme segir fyrrgreinda viðhorfsbreytingin meðal annars felast í því að í stað þess að hugsa um sölu á vöru er útgangspunkturinn sá að verið er að selja lausnir.

„Fyrirtæki eru ekki lengur að selja vöru heldur lausnir og því mikilvægt að þau skilji hvernig varan er notuð til að átta sig á því hvað það er sem fólk vill gera, hvaða þörf er verið að uppfylla og hvaða vandamál er verið að leysa,“ segir Salóme.

Að sögn Salóme kalla hraðar tæknibreytingar í heiminum á það að fyrirtæki þurfa að endurskoða stefnu og markmið fyrirtækja töluvert tíðari en áður. Það skýrist einfaldlega af því að stafræn umbylting er að hafa svo mikil áhrif á viðskiptaumhverfi fyrirtækja.

„Til að geta með skilvirkum hætti brugðist við þessari framþróun er mikilvægt að stjórnendur fyrirtækja geri sér grein fyrir þessari umfangsmiklu breytingu, skilji þá tækni sem drífur hana áfram og þekki helstu strauma og stefnur,“ segir Salóme.

Ein leiðin er að tengjast nýsköpunarumhverfinu

Salóme segir eina leiðina til að fylgjast vel með er að skoða hvers konar ný fyrirtæki er verið að stofna. Hvers eðlis þau eru, hvernig þau eru að nýta tækninýjungar og hvaða viðskiptamódel þau eru að kynna.

„Ég tel enn fremur mikil verðmæti fólgin í því fyrir rótgróin fyrirtæki að eiga reglulegt samtal við frumkvöðla um þær áskoranir sem þau standa frammi fyrir hverju sinni. Það gæti veitt þeim nýja sýn á viðfangsefnið og ferskar hugmyndir að lausnum. Slíkt samtal býður einnig upp á tækifæri til samstarfs sem gætu skapað virði á báða bóga,“ segir Salóme.

Með þessu samtali geta rótgróin fyrirtæki lært heilmikið af nýsköpunar- og frumkvöðlastarfi þeirra sem þar eru. Nefnir hún sem dæmi að hjá Icelandic Startups sé fyrirtækjum boðinn aðgangur að hringiðu nýsköpunar- og frumkvöðlastarfs með margvíslegum hætti.

„Fyrirtækjum býðst til dæmis að senda teymi til þátttöku í viðskiptahraðla þar sem þau geta unnið að nýsköpunarverkefnum fyrirtækisins í lifandi umhverfi, sótt innblástur, kynnst frumkvöðlum og frá fyrstu hendi þeim aðferðum sem verið er að beita við þróun nýrra viðskiptahugmynda,“ segir Salóme og bætir við 

Sú leið er tilvalið tækifæri til að umbuna framúrskarandi starfsmönnum og í raun endurmenntun sem á sér enga líka.“

En að hverju þurfa stjórnendur sérstaklega að huga þegar þeir vilja innleiða nýsköpunarstefnu á markvissan hátt?

Salóme segir þróun stafrænna lausna geta haft mikil áhrif á það hvernig fyrirtæki geta dregið úr sóun og fundið nýjar leiðir til að bjóða sömu vöru eða þjónustu og áður en ekki síður gert fyrirtækjum kleift að komast inn á nýja markaði og umbylt gamalgrónum viðskiptamódelum.

Stafræn þróun er þar með mikilvægur liður í að stofna ný tekjustreymi og tækifæri til fjölbreyttari samskiptaleiða við viðskiptavini og starfsmenn.

En stjórnendur sem vilja innleiða nýsköpunarstefnu með markvissum hætti geta líka nýtt sér fleiri leiðir.

„Hakkaþon og starfsdagar þar sem nýsköpun er höfð í forgrunni eru tilvaldir fyrir samstillingu, hugarflug og æfingar sem opna augu starfsmanna fyrir þeim tækifærum sem nýsköpun felur í sér, en duga skammt ef ekki fylgir vel ígrunduð áætlun um næstu skref. 

Flóknasti parturinn er ekki að fá hugmyndir heldur framkvæma þær.

Fyrirtæki sem verja tíma og fjármunum í að vera stöðugt á tánum og þróa nýjar lausnir sem byggja á nýjustu tækni eru líklega þau sem koma til með að ná mestum árangri. Til að geta hreyft sig hratt er ákjósanlegast að fyrirtæki myndi sjálfstæð teymi og láti sprota um að þróa og prófa nýjungar,“ segir Salóme.

Að lokum hvetur Salóme stjórnendur rótgrónari fyrirtækja að hafa samband við Icelandic Startups því þeirra starf felist meðal annars í því að tengja fyrirtæki betur við umhverfi sprotafyrirtæki.