Lara Croft hefur aldrei litið betur út

Ævintýrakonan Lara Croft er orðin tuttugu ára gömul en fyrsti leikurinn í þessari vinsælu seríu kom út árið 1996 og sló í gegn. Þá var hún brjóstgóð ofurhetja í pínulitlum buxum sem felldi jafnt menn sem risaeðlur án þess að svitna.

Serían var svo endurræst árið 2013 og gerð aðeins raunverulegri. Aðeins.

Nýjasti leikurinn um Löru Croft er líklegast sá besti og er greinilegt að Crystal Dynamics vita hvað þeir eru að gera. Í ROTTR má finna góða blöndu af klisju og alvarleika og útlit leiksins er einfaldlega frábært.

Þá er mjög mikið að sjá og gera í leiknum og oft á tíðum er erfitt að halda dampi þar sem maður vill helst kíkja undir hvern stein og á bakvið hvert tré.

Leikurinn Rise of the Tomb Raider var gefinn út fyrir Xbox One og 360 í nóvember. Á dögunum var hann hins vegar gefinn út fyrir PC og til stendur að gefa hann út fyrir PS4 seinna á þessu ári. Um er að ræða annan leikinn um ævintýrakonuna frægu frá því að serían var, eins og áður hefur komið, endurreist fyrir þremur árum.

Þá var Lara Croft táningur sem varð skipreka á undarlegri eyju og þurfti að berjast fyrir lífi sínu.

Að þessu sinni drepur hún haug manna og dýra á eigin forsendum þar sem Lara fylgir vísbendingum sem faðir hennar skildi eftir sig í leit að undraverðum fornmuni sem sagður er geta veitt endalaust líf.

Í leiðinni þarf hún að fletta ofan af sögu gripsins og mannsins sem bar hann.

Í grunninn gengur Tomb Raider út á að lifa af í mjög svo óvinveittu umhverfi, safna birgðum, byggja vopn og finna fornmuni. Þá þarf Lara að læra ýmis tungumál og verða öflugri bardagakona svo auðveldara sé að ganga frá málaliðum á nýstárlega máta.

Karakterkerfi leiksins er mjög gott og þá er einnig hægt að betrumbæta öll vopnin sem Lara beitir gegn dýrum og málaliðum skuggalegra samtaka sem elta hana við hvert fótmál og leita að sama fornmuni.

Þrautir leiksins eru gífurlega skemmtilegar og krefjandi, en þær mættu jafnvel vera fleiri. Með skemmtilegri atburðum leiksins eru fjársjóðsleitir sem hægt er að taka elta uppi og tengjast sögu leiksins í raun ekki. Bardagar Löru fela oftar en ekki í sér að laumast úr einu fylgsni í annað og koma óvinum að óvörum. Þó er nóg um skotbardaga í ROTTR og skotkerfi leiksins virkar einnig vel.

Jafnvel of vel, þar sem oft á tíðum er ónauðsynlegt að laumupúkast og þess í stað hægt að hlaupa bara um skjótandi.

Það sem er hægt að setja út á í PC útgáfunni er til dæmis það að örvatakkarnir bjóða oft á tíðum ekki upp á jafn mikla nákvæmni í hreyfingum og fjarstýringar leikjatölva. Því gerðist það tiltölulega oft að ég hoppaði fram af klettasyllum og hitti ekki á brúnir sem ég ætlaði mér að grípa í.

Það sem einkennir PC útgáfu ROTTR þó sérstaklega útlitið. Grafíkin er mjög góð og með réttu tölvunum er hægt að gera hana einstaka. Spilunin er skemmtileg og þrautirnar eru krefjandi. Bardagar eru einnig skemmtilegir, svæði leiksins eru stór og stútfull af hlutum til að finna.