Endurskoðuð áramótaheit

Manstu þegar þú strengdir áramótaheit snemma í upphafi ársins og lofaðir sjálfinu að huga betur að heilsunni, hætta að reykja, rífa kjaft eða minnka mittismálið eftir óhófleg veisluhöld undanfarinna daga?

Réttið upp hönd, þið ykkar sem núna sjö mánuðum síðar fylgir settum markmiðum.

Nei, það er nefnilega það sem ég hélt.

Meira en helmingur þeirra sem strengja heit um áramótin er búinn að gefast upp á þessum tímapunkti og oft og tíðum á sama stað og þeir voru í lok síðasta árs. Ef markmiðin voru raunhæf og mannbætandi þá er um að gera að rifja þau upp og huga að nokkrum atriðum sem gætu komið þér aftur af stað.

Notaðu dagatalið

Flestir eru með dagatal í tölvunni eða símanum og er upplagt að skipuleggja vikuna á sunnudagskvöldum, það eru meiri líkur á því að af atburðum verði. Ákveddu að þú ætlir í líkamsrækt eða rækta fjölskylduna og settu það á dagatalið hvenær þú ætlar að gera það.

Sjáðu takmarkið fyrir þér

Greindu markmiðið þín og spurðu þig af hverju þú vilt ná þeim. Hverjum er það til góða, yrði líf þitt betra? Sjáðu fyrir þér hvernig líf þitt yrði ef þú næðir tilsettum markmiðum.

Verðlaunaðu þig

Hafir þú sett þér háleit markmið er afskaplega gott að búta þau niður í smærri hluta. Segjum sem svo að þú ætlir þér að missa tólf kíló á árinu, hlutaðu markmiðið þá niður í 1 kíló á mánuði og verðlaunaðu þig þegar þú nærð því.

Skrifaðu niður

Ein áhrifaríkasta leiðin til þess að ná árangri er að skrifa niður markmiðin, taktu þér tíma til að skrifa þau niður og spurðu þig um leið af hverju þú viljir ná þeim.

Segðu frá

Ein leið til þess að setja pressu á sjálfan sig er að segja öðrum frá settum markmiðum.

Jákvæðni

Jákvæðni veitir mikinn drifkraft og er skynsamleg sem rauður þráður í að ná settum markmiðum.