Brjóstin mín og brjóstin þín?

Geirvörtur sprengja internetið. Þessar fögru ávölu. Eða eru þær allar fagrar? Eiga geirvörtur að vera stórar eða standa út í loftið eða hárlausar?

Þegar ég var tíu ára hljóp ég um strendur Flórída ber að ofan. Allt í einu kom fullorðinn maður askvaðandi til mín, kallaði á mömmu og bað hana vinsamlegast að hylja mig, þetta særði blygðunarkennd og væri beinlínis ólöglegt. Það var varla hægt að kalla þetta brjóst sem ég var með. Geirvörturnar rétt farnar að springa út og alls ekkert kynferðislegt við þær, allavega ekki í mínum huga.

Ég horfði á hverja skólasystur mína á fætur annarri springa út eins og blóm að vori en ég, nei, geirvörturnar stækkuðu en það var ekki mikið meira til að gleðjast yfir. Ég gerði heiðarlega tilraun til að troða mér í Wonderbra en það var ekkert til að lyfta upp og þrýsta saman. Dæs. Þegar brjóstin fóru loks að taka á sig smá mynd um þrettán ára aldur þá fagnaði ég eins og enginn væri morgundagurinn. Loksins, loksins, komið fagnandi. Óskaplega var það skammvinn gleði. Mér fannst þau frekar ómerkileg og gat ómögulega ímyndað mér að einhverjum þætti þau kynferðislega spennandi.

Ég var fljót að skauta fram hjá keleríi brjóstanna þegar fálmandi hendur fóru um líkamann, þetta voru bara brjóst og það voru aðrir staðir sem kölluðu frekar á athygli. Ég nennti ekki að vera í brjóstahaldara (og nenni því reyndar ekki enn) og fannst bara allt í lagi þó einstaka geirvarta sæist í gegnum fötin og að brjóstin hoppuðu til og frá þegar ég labbaði. Mér finnst enn þá ákveðið frelsi í því.

En svo man ég eftir öllum hinum sem þykir þetta óþægilegt. Sem stara á geirvörtur sem kíkja í gegnum bolinn eða peysuna. Þetta þykir ögrandi.

Svo við gleymum því ekki að brjóst eiga að líta út á ákveðinn hátt því annað er ekki sexí og ekki kvenlegt og það má engin kona falla í þá gryfju. Annars vill enginn gaur sofa hjá henni. Það er auðvitað dauðadómur í sjálfu sér.

Mín brjóst eru til fyrir þig. Svo þú getir horft á þau, nuddað þau, snert þau og ef þú hefur séð klám, reynt að troða þér á milli þeirra. Föt eru hönnuð þannig að brjóst þurfa að liggja á ákveðinn hátt svo flíkin njóti sín. Sjaldan hefur jafn mikil pólitík verið í kringum brjóst og einmitt núna. Það er næstum því regluverk um það hvernig þau eiga að vera.

Sýndu smá en ekki of mikið. Passaðu að lyfta þeim upp svo þau lafi ekki. Það gleymist að brjóstin breytast rétt eins og konan sem ber þau. Stundum eru þau sexí, stundum fæðustöð, stundum örvunarstaður, stundum bara þreytt en alltaf pólitísk á meðan þú starir á þau og finnur að þau pota í þig og þínar hugmyndir um konur.