Á framandi slóðum

Hliðarverkefni lítils hóps innan CCP er nú orðið að raunverulegu alheimsfyrirbæri. Fyrirtækið kynnir nýja útgáfu af EVE: Valkyrie á Fanfest um helgina og boðar byltingu í sýndarveruleika.

Það er eitthvað stórmerkilegt um að vera í Hörpu þessa dagana. Ég á ekki við 1.500 EVE Online spilara hvaðanæva úr heiminum sem kynna sér nýjasta nýtt frá leikjaframleiðandanum CCP, eða alheims-valdabaráttu og ráðabrugg sömu spilara (fimmtudagur, eins og það er kallað í EVE). Það sem ég á við hefur mun víðari skírskotun en EVE Online, því í Hörpu færir CCP okkur tækifæri til að upplifa næstu byltingu tölvuleikjanna.

Ári síðar

CCP kynnti EVE: Valkyrie til leiks í ágúst 2013 og leikurinn sló eftirminnilega í gegn á Fanfest á síðasta ári. Í stuttu og afar einfölduðu máli er EVE: Valkyrie hraður loftbardagaleikur þar sem spilarar æða á milli himintunglanna og risavaxinna geimskipa og freista þess að granda orrustuþotum óvinarins. CCP nýtir hér nýjasta nýtt í sýndarveruleikatækni frá Oculus og Sony, en fyrirtækin tvö tilheyra sífellt stækkandi hópi leikjaframleiðenda og tæknifyrirtækja sem eru að reyna fyrir sér í sýndarveruleika.

Útgáfan sem gestir á Fanfest 2014 fengu að spreyta sig á var frábær en það var augljóst að um var að ræða verkefni sem átti eftir að útfæra. Hafa skal í huga að aðeins örfáir leikir hafa verið þróaðir frá grunni fyrir sýndarveruleikagleraugu og því eru leikjaframleiðendur á framandi slóðum í þessum efnum.

Það sem CCP færir spilurum þetta árið er ekkert annað en stórkostleg upplifun og þessi staðreynd blasir við spilaranum um leið og hann treður Oculus Rift (DK2) á andlitið og er þeytt út í víðáttur geimsins. Viðmót spilarans blasir við í stjórnklefanum en um leið og hann lítur um öxl til að elta uppi óvininn glatar hann nauðsynlegum upplýsingum um geimskipið. Leikurinn krefst þess að þú horfir í kringum þig, þannig verður sýndarveruleikinn og hreyfing spilarans hluti af spiluninni.

„Þetta er það sem er svo skemmtilegt við þetta,“ segir Sigurður Gunnarsson, forritari EVE: Valkyrie. „Það er ekki enn búið að skrifa bókina um leikjahönnun í sýndarveruleika. Þannig að við erum endalaust að prófa nýja hluti.“

„Þessar heita valkyrjur“

Vígvöllurinn er risavaxinn (CCP virðist bara kunna að gera risavaxið) og á sporbraut um fjarlæga plánetu. Umfang og fegurð leiksins eru slík að spilunin nánast víkur fyrir þrívíðum heimi EVE: Valkyrie. Skyndilega springur stjórnklefinn, spilarinn situr eftir tepptur í ís og dauðvona. Þetta er reynsla sem hvergi annars staðar er hægt að upplifa í sýndarveruleika en í EVE: Valkyrie.

„Við höfum fundið fyrir miklum áhuga frá því að við sýndum leikinn fyrst fyrir tveimur árum, og það var eitthvað sem við settum saman í okkar frítíma, þannig að það er mikil spenna fyrir þessu.“

Þetta bílskúrsverkefni Sigurðar og félaga er nú orðið að hreyfiafli í sýndarveruleikabransanum. EVE: Valkyrie verður fáanlegur um leið og Oculus og Sony gefa út leikjagleraugu sín. Það síðarnefnda hefur lofað útgáfu á fyrri helmingi ársins 2016. Bæði fyrirtækin hafa gefið út útgáfur fyrir hönnuði og forritara og fjölmargir hafa tryggt sér eintak.

„Það geta allir keypt þetta og það er slatti af fólki sem hefur gert það til þess að geta spilað það nýjasta. Ég veit til dæmis að Oculus hefur þegar selt yfir 100 þúsund eintök af nýjustu tilraunatýpunni, DK2.“

Nýsköpun í öðru veldi

Sigurður er sannfærður um að sýndarveruleikatæknin eigi eftir að verða áberandi á næstu árum. Auk Oculus og Sony hafa leikja- og tæknirisar á borð við Valve og Microsoft kynnt hugmyndir sínar um þrívíddartækni. Það er síðan til vitnis um væntingar manna að Facebook keypti Oculus á dögunum fyrir lauflétta 276 milljarða króna.

„GDC-leikjasmiðaráðstefnan, sem var að ljúka um daginn, var undirlögð af VR og ég spái því að á E3-leikjaráðstefnunni í júní þá eigi stærri fyrirtæki eftir að koma með stórar tilkynningar í tengslum við VR. Þetta á eftir að fara á flug á næstu 1-2 árum,“ segir Sigurður.

Það er ómögulegt að lýsa í rituðu orði þeim hughrifum sem EVE: Valkyrie vekur hjá manni. Í grunninn snýst þetta ekki um útlit eða fagurfæði heldur einfaldlega um leikjaframleiðanda, sem virðist hafa náð traustum tökum á einhverju sem er manni algjörlega framandi.