Oddvitaáskorunin - Lífið er pólitík

Vísir stendur fyrir Oddvitaáskoruninni 2014 þar sem skorað er á oddvita allra flokka í kjördæmum um land allt að taka þátt.

Bjarki Bjarnason leiðir lista Vinstri grænna í Mosfellsbæ í sveitarstjórnarkosningunum í vor.

Stutt kynning

- Fyrrverandi kúasmali á Mosfelli og frjálsíþróttafrík á Varmárvelli.

- Var sjálfstæðismaður þegar ég var átta ára og framsóknarmaður tólf ára. Síðan hefur margt breyst.

- Ætlaði að verða flugmaður þegar ég var ungur drengur.

- Lék á trompet í Skólahljómsveit Mosfellssveitar og töfraspegilinn í leikritinu Mjallhvíti hjá Leikfélagi Mosfellssveitar.

- Lærði latínu og forngrísku í Þýskalandi en glímu á Laugarvatni.

- Hef skrifað margar bækur, bæði sagnfræðirit og skáldskap, þær síðustu í lazy-boy, mjög þægilegt.

- Farandsmali á haustin í Þingvallasveit og Kjós.

- Hef alltaf fylgst náið með stjórnmálum vegna þess að lífið er pólitík.

- Kjörorð mitt er: Njótum lífsins, drepum ekki tímann með leiðindum; enginn tími til þess!

Stefnumál Bjarka má sjá í myndbandinu hér að neðan.

YFIRHEYRSLAN

Hver er fallegasti staðurinn á Íslandi?

Þingvellir.

Hundar eða kettir?

Hundakisur.

Hver er stærsta stundin í lífinu?

Þegar við fæðumst.

Hver er uppáhaldsmaturinn þinn?

Bjúgu.

Hvernig bíl ekur þú?

Kia-épplingi.

Besta minningin?

Dagurinn í dag.

Hefur þú verið tekinn af lögreglunni?

Já.

Hverju sérðu mest eftir?

Það þýðir lítið að gráta liðna tíma en maður lærir alltaf af reynslunni.

Draumaferðalagið?

Sá draumur rættist árið 2007 þegar ég fór í hjólaferð um Færeyjar.

Hefur þú migið í saltan sjó?

Já, var mikið á togurum hér í eina tíð.

Hvað er það skrýtnasta sem þú hefur gert?

Þegar mig dreymdi að lífið væri ekki skrýtið.

Hefur þú viðurkennt mistök?

Já.

Hverju ertu stoltastur af?

Börnunum mínum og barnabörnum.

Fram að sveitarstjórnarkosningunum 31. maí munum við birta kynningu á oddvitum víðsvegar um landið. Allir oddvitar geta tekið þátt í Oddvitaáskorun Vísis. Nánari upplýsingar er hægt að nálgast á netfanginu [email protected].

Allar fréttir af sveitarstjórnarkosningunum 2014 má nálgast á Kosningavef Vísis, visir.is/kosningar.