Sannleikurinn: Fjármálaráðherra byrlað nauðgunarlyf á gamlárskvöld

„Maður er greinilega aldrei óhultur, sama hvaða fólki maður er með,“ segir Bjarni Benediktsson, sem byrlað var nauðgunarlyf um áramótin. Bjarni deildi lífsreynslu sinni á Facebook-síðu sinni í gær og vonast til að þetta verði öðrum víti til varnaðar.

„Maður verður að passa drykkina sína. En ég var með tvö hvítvínsglös, eitt kampavínsglas og bjór í gangi á sama tíma og erfitt að fylgjast með öllu. Ég var að fara að horfa á Skaupið þegar ég allt í einu steinrotaðist. Einhverri aumkunarverðri sál tókst að setja nauðgunarlyf í einn af drykkjunum mínum á meðan ég var úti með stjörnuljós,“ segir Bjarni í færslu á Facebook.

„Áhrif þess virkuðu þannig á mig að ég sljógaðist fyrst niður, gat ekki stigið almennilega í fæturnar og varð alveg máttlaus. Svipuð tilfinning og ég fékk þegar Jón Gnarr var kosinn borgarstjóri. Ég man eftir upphafslagi Skaupsins þar sem Vigdís Hauksdóttir var að syngja og hugsaði með mér að ég væri staddur í einhverri martröð. Svo sofnaði ég.“

Bjarna grunar helst aldraðan frænda konunnar sinnar um að setja lyfið í drykkinn sinn en sá er alltaf voða hljóður þegar talað er um Sjálfstæðisflokkinn og setur upp svip eins og hann sé að kúgast.

„Ég man ekkert eftir því sem gerðist síðan. Ég þakka hins vegar fyrir að ekki fór verr - sem hefði auðveldlega getað gerst ef ekki hefði verið fyrir frábært skaup sem dró alla athyglina frá mér. Ég ákvað að deila þessu í dag í von um að vera öðrum víti til varnaðar. Það tekur örskamma stund að setja svona eitur í drykkinn þinn og það er fullt af andstæðingum þarna úti sem eru til í að leggjast ansi lágt.

Farið varlega inn í nýja árið elsku vinir og passið ykkur á þessu vinstra liði. Maður veit aldrei hvað það gerir.“



Sannleikurinn rekur öfluga og óvæga fréttastofu þar sem engum er hlíft og sannleikurinn skiptir ekki höfuðmáli. Sannleikurinn er háður öllum stjórnmálaflokkum og hagsmunaaðilum um fréttaefni sitt. Fréttastofa Sannleikans hefur Facebook-síðu þar sem gott er að hvíla sig eftir erfiðan dag.